അംഗൻവാടിയിൽ പിഞ്ചുകുട്ടിയെ ഭയപ്പെടുത്തിയ സംഭവം; മാതാവ് പരാതി പിൻവലിച്ചു

കല്യാശ്ശേരി: സെൻട്രൽ രണ്ട് പാറക്കടവ് അംഗൻവാടിയിൽ പിഞ്ചുകുട്ടിയെ ഭയപ്പെടുത്തിയ സംഭവത്തിൽ കുറ്റക്കാർ കുട്ടിയുടെ വീട്ടിലെത്തി മാതാവിനോട് ക്ഷമ പറഞ്ഞു. തുടർന്ന് പരാതിക്കാരിയായ കുട്ടിയുടെ അമ്മ പി.വി. റംസീന പരാതിയിൽനിന്ന് പിൻ വാങ്ങുകയാണെന്ന് അറിയിച്ചു. കുട്ടിയെ അടുത്ത പ്രവൃത്തിദിവസം മുതൽ അംഗൻവാടിയിൽ അയക്കണമെന്ന അധികൃതരുടെ ആവശ്യവും പരാതിക്കാരി അംഗീകരിച്ചു. ഭാവിയിൽ കുട്ടികളോട് തെറ്റായരീതിയിലുള്ള സമീപനങ്ങൾ ഉണ്ടാകില്ലെന്ന് ഉറപ്പുകിട്ടിയതായും പരാതിക്കാരി അറിയിച്ചു. പിഞ്ചുകുട്ടി കുളിമുറിയുടെ പുറത്ത് മൂത്രമൊഴിച്ചതിനാണ് നുള്ളിയതും ഭയപ്പെടുത്തിയതുമെന്നാണ് കുട്ടിയുടെ അമ്മ നൽകിയ പരാതിയിൽ പറഞ്ഞിരുന്നത്. തുടർന്ന് കണ്ണപുരം പൊലീസിലും കല്യാശ്ശേരി ശിശുവികസന ഓഫിസിലും ജില്ല ഓഫിസിലും പരാതി നൽകിയിരുന്നു.