കോർപറേഷൻ കൗൺസിൽ യോഗം: സമ്പൂർണ പാർപ്പിട സുരക്ഷ പദ്ധതി; ഭൂരഹിതർക്കായി ഭൂമി കണ്ടെത്തും

കണ്ണൂർ: സമ്പൂർണ പാർപ്പിട സുരക്ഷ പദ്ധതിയുമായി ബന്ധപ്പെട്ട അപേക്ഷകളിൽ ഉടൻ തീർപ്പുകൽപിക്കാൻ നടപടിയുണ്ടാകുമെന്ന്​ മേയർ ടി.ഒ. മോഹനൻ. സമ്പൂർണ പാർപ്പിട സുരക്ഷ പദ്ധതിയി​​ൽ അപേക്ഷകരായ ഭൂരഹിതർക്ക്​ കോർപറേഷനുള്ളിൽതന്നെ ഭൂമി കണ്ടെത്താൻ നടപടി സ്വീകരിക്കുമെന്നും അദ്ദേഹം കൗൺസിൽ യോഗത്തെ അറിയിച്ചു. ഭരണപക്ഷ, പ്രതിപക്ഷ കൗൺസിലർമാരുടെയും ക്ഷേമകാര്യ, പൊതുമരാമത്ത്​ സ്റ്റാൻഡിങ്​ കമ്മിറ്റികളുടെയും കൂട്ടായ പ്രവർത്തനം ആവശ്യമാണെന്നും മേയർ ഉന്നയിച്ചു. തീരുമാനത്തെ പ്രതിപക്ഷ കൗൺസിലർമാരടക്കം സ്വാഗതം ചെയ്തു. ഇറിഗേഷൻ വകുപ്പിന്‍റേതുൾപ്പെടെ സർക്കാറിന്​ കീ​ഴിലുള്ള ഉപയോഗശൂന്യമായ സ്ഥലം കണ്ടെത്താൻ നടപടി സ്വീകരിക്കും. സ്ഥലം നിർധനരായ അപേക്ഷകർക്ക്​ ഭവന സമുച്ചയം നിർമിക്കാനുള്ള മാസ്റ്റർ പ്ലാൻ തയാറാക്കും. പി.എം.എ.വൈ, ലൈഫ്​ മിഷൻ എന്നിങ്ങനെ ഏത്​ പദ്ധതിയിലാണ്​ ​തങ്ങൾ അ​പേക്ഷിക്കുന്നതെന്ന ധാരണ സാധാരണക്കാർക്ക്​ ഇല്ലാത്ത സ്​ഥിതിയാണെന്ന്​ മേയർ ചൂണ്ടിക്കാട്ടി. ഈ വിഭാഗത്തിൽ ലഭിക്കുന്ന അപേക്ഷകൾ കൃത്യമായി പരിശോധിച്ച്​ സൂക്ഷ്മമായ പട്ടിക തയാറാക്കി നടപടി സ്വീകരിക്കുമെന്നും മേയർ അറിയിച്ചു. ചേലോറ ട്രഞ്ചിങ്​ മാലിന്യ ഗ്രൗണ്ടിൽ 60 വർഷമായി കെട്ടിക്കിടക്കുന്ന മാലിന്യം നീക്കാൻ ടെൻഡർ ക്ഷണിച്ചു. റോയൽ വെസ്​റ്റേൺ പ്രോജക്ട്​ എന്ന സ്വകാര്യ കമ്പനിയാണ്​ മാലിന്യ നീക്കത്തിനുള്ള കരാർ ഏറ്റെടുക്കാൻ ടെൻഡർ സമർപ്പിച്ചത്​. നദികളിലേക്കും പുഴകളിലേക്കും ഒഴുകുന്ന മലിന ജലത്തിന്‍റെ അളവ്​ കുറക്കുന്നത്​ സംബന്ധിച്ചുള്ള മാസ്റ്റർ പ്ലാൻ തയാറാക്കും. ഇതിനായുള്ള കൂടുതൽ പഠനത്തിന്​ കോർപറേഷൻ ആരോഗ്യ വിഭാഗത്തെ നിയോഗിച്ചയാതും മേയർ അറിയിച്ചു. .......................................................................................................... എസ്റ്റിമേറ്റ്​ പുതുക്കൽ പതിവ്​; എൻജിനീയർമാരുടെ അലംഭാവമെന്ന്​ കോർപറേഷന്‍റെ വിവിധ ഡിവിഷനുകളിൽ നടക്കുന്ന പൊതുമരാമത്ത്​ പ്രവൃത്തികളിൽ മിക്കതിലും എസ്റ്റിമേറ്റ്​ പുതുക്കൽ പതിവാണെന്നും ഇത്​ എൻജിനീയർമാരുടെ അലംഭാവം മൂലമാണെന്നും ഭരണ, പ്രതിപക്ഷ കൗൺസിലർമാർ ഒരുപോലെ യോഗത്തിൽ ഉന്നയിച്ചു. പലയിടത്തും ആദ്യം നിശ്ച​യിച്ച എസ്റ്റിമേറ്റ്​ പ്രവൃത്തി തുടങ്ങി മാസങ്ങൾ പിന്നിട്ട്​ വീണ്ടും പുതുക്കേണ്ട സ്ഥിതിയാണ്​. ഇത്​ തങ്ങൾപോലുമറിയാതെയാണ്​ എൻജിനീയർമാരു​ടെ ​നേതൃത്വത്തിൽ കൈകാര്യം ചെയ്യുന്നതെന്ന്​ കൗൺസിലർമാർ ആരോപിച്ചു. എസ്റ്റിമേറ്റിലെ അപാകതകൾ നിത്യസംഭവമാണെന്നും ഇതിൽ എൻജിനീയറിങ്​ വിഭാഗം സൂക്ഷ്മത പുലർത്തണമെന്നും മേയർ നിർദേശിച്ചു. അതത്​ വാർഡ്​ കൗൺസിലർമാരുടെ അഭാവത്തിൽ എൻജിനീയർമാർ എസ്റ്റിമേറ്റ്​ തയാറാക്കരുതെന്നും മേയർ നിർദേശിച്ചു. കൂടുതൽ ജോലികളും മതിയായ ഉദ്യോഗസ്ഥരുടെ അഭാവവുമാണ്​ ഇത്തരം പിശകുകൾ വരാൻ കാരണമെന്ന്​ സീനിയർ എൻജിനീയർ യോഗത്തിൽ വിശദീകരിച്ചു. 500ഓളം ​പ്രവൃത്തികൾ ചെറിയ സമയത്തിനുള്ളിൽ ചെയ്തുതീർക്കേണ്ട അധികഭാരമാണ്​ ഉദ്യോഗസ്​ഥർക്ക്​. ഇതാണ്​ പലപ്പോഴും വീഴ്ചകൾക്ക്​ വഴിവെക്കുന്നതെന്നും അദ്ദേഹം യോഗത്തിൽ അറിയിച്ചു.