തളിപ്പറമ്പിൽ അനധികൃത പാർക്കിങ്: നടപടി വേണമെന്ന് ആവശ്യം

തളിപ്പറമ്പ്: ബാങ്ക് സ്ട്രീറ്റിനുമുന്നിലെ അനധികൃത പാർക്കിങ്ങിനെതിരെ നടപടിയെടുക്കണമെന്ന ആവശ്യം ശക്തമായി. കാക്കാത്തോട് ബസ് സ്റ്റാൻഡിൽനിന്ന് ദേശീയ പാതയിലേക്കുള്ള റോഡ് കൈയേറി വാഹനങ്ങൾ പാർക്ക് ചെയ്യുന്നത് കാൽനടക്കാർക്കുപോലും ദുരിതമാവുകയാണ്. നഗരസഭ അധികാരികൾ ഇടപെട്ട് കഴിഞ്ഞ ഭരണസമിതിയുടെ നേതൃത്വത്തിൽ കാക്കാത്തോട് നിന്നും ദേശീയപാതയിലെത്തുന്ന റോഡ് വീതികൂട്ടി മെക്കാഡം ടാർ ചെയ്ത് നവീകരിച്ചിരുന്നു. 'നോ പാർക്കിങ്' ബോർഡ് സ്ഥാപിച്ചെങ്കിലും വാഹനങ്ങൾ റോഡിൽ തന്നെയാണ് നിർത്തിയിടുന്നത്. എന്നിട്ടും പൊലീസ് നടപടി എടുക്കുന്നില്ലെന്നാണ് ആക്ഷേപം. അടിയന്തരമായി നടപടിയെടുക്കണമെന്നാണ് ആവശ്യം.