മൊബൈലിൽ സംസാരിച്ച് ഡ്രൈവിങ്; ബസ് ഡ്രൈവർക്കെതിരെ കേസ്

കണ്ണൂർ: മൊബൈൽ ഫോണിൽ സംസാരിച്ച് അപകടകരമായി സ്വകാര്യ ബസ് ഓടിച്ച ഡ്രൈവർക്കെതിരെ മോട്ടോർ വാഹന എൻഫോഴ്‌സ്മെന്റ് വിഭാഗം കേസെടുത്തു. ഡ്രൈവറുടെ ലൈസൻസ് സസ്‍പെൻഡ് ചെയ്യാൻ ശിപാർശ ചെയ്തതായി കണ്ണൂർ ആർ.ടി.ഒ അറിയിച്ചു. പയ്യന്നൂർ -കണ്ണൂർ റൂട്ടിൽ ഓടുന്ന വെസ്റ്റേൺ ബസ് ഡ്രൈവർക്കെതിരെയാണ് കണ്ണൂർ ആർ.ടി.ഒ (എൻഫോഴ്‌സ്മെന്റ്) പ്രമോദ് കുമാറിന്റെ നിർദേശപ്രകാരം മോട്ടോർ വെഹിക്ൾ ഇൻസ്പെക്ടർ ജഗൻലാലും സംഘവും കേസെടുത്തത്. ഡ്രൈവർ മൊബൈലിൽ സംസാരിച്ചുകൊണ്ട് ബസ് ഓടിക്കുന്ന ദൃശ്യം യാത്രക്കാർ കാമറയിൽ പകർത്തി എൻഫോഴ്‌സ്മെന്റ് വിഭാഗത്തിന് അയച്ചുനൽകിയിരുന്നു.