പായത്ത് പാതയോരം ശുചീകരിച്ചു

ഇരിട്ടി: എന്റെ പായം മാലിന്യമുക്ത പായം പരിപാടിയുടെ ഭാഗമായി പായം പഞ്ചായത്തിലൂടെ പോകുന്ന 15 കിലോമീറ്ററോളം പാതയോരം ജനകീയ പങ്കാളിത്തത്തോടെ ശുചീകരിച്ചു. ഇരിട്ടി പാലം മുതൽ വള്ളിത്തോട് ആശുപത്രി വരെയുള്ള ഇരിട്ടി -വളവുപാറ കെ.എസ്.ടി.പി റോഡിന്റെ ഇരു ഭാഗങ്ങളുമാണ് ശുചീകരിച്ചത്. പഞ്ചായത്ത് പ്രസിഡന്റ് പി. രജനി ഉദ്‌ഘാടനം ചെയ്തു. വൈസ് പ്രസിഡന്റ് എം. വിനോദ്‌കുമാർ, വി. പ്രമീള, പി.പി. കുഞ്ഞൂഞ്ഞ്, ഷൈജൻ ജേക്കബ്, ഇരിട്ടി പ്രിൻസിപ്പൽ എസ്.ഐ ദിനേശൻ കൊതേരി, പി.സി. പോക്കർ എന്നിവർ സംസാരിച്ചു. വിവിധ ഇടങ്ങളിലായി പഞ്ചായത്തംഗങ്ങൾ, സി.ഡി.എസ്, എ.ഡി.എസ് അംഗങ്ങൾ, കുടുംബശ്രീ പ്രവർത്തകർ, ഹരിതകർമസേന, സിവിൽ ഡിഫൻസ് അംഗങ്ങൾ, പൊലീസ്, എൻ.എസ്.എസ് വളന്റിയർമാർ, രാഷ്ട്രീയ, സാംസ്‌കാരിക, യുവജന സംഘടന പ്രവർത്തകർ, വ്യാപാരികൾ തുടങ്ങിയവർ ശുചീകരണത്തിൽ പങ്കാളികളായി.