അവധിക്കാലം ആഘോഷമാക്കാം, സീവ്യൂ പാർക്കും തുറക്കുന്നു

പടം -സന്ദീപ്​ കണ്ണൂർ: കോവിഡിനെ തുടർന്ന് ദീർഘകാലമായി പൂട്ടിയിട്ട പയ്യാമ്പലം സീ വ്യൂ പാർക്ക്​ തുറക്കാനൊരുങ്ങുന്നു. ഡി.ടി.പി.സിയുടെ നേതൃത്വത്തിൽ അര കോടി രൂപ ഉപയോഗിച്ചാണ്​ പാർക്കിന്‍റെ നവീകരണപ്രവൃത്തി നടക്കുന്നത്​. പ്രവൃത്തി അന്തിമ ഘട്ടത്തിലാണെന്നും മാർച്ചിൽ തന്നെ പാർക്ക്​ സന്ദർശകർക്കായി തുറന്നുകൊടുക്കുമെന്നും ഡി.ടി.പി.സി സെക്രട്ടറി ജെ.കെ. ജിജേഷ്​ കുമാർ അറിയിച്ചു. ദീർഘകാലമായി അടച്ചിട്ടതിനെ തുടർന്ന്​ ഇരിപ്പിടങ്ങളും മറ്റും നശിച്ചിരുന്നു. കുട്ടികൾക്കായുള്ള കളി ഉപകരണങ്ങളടക്കം കൂടുതൽ സൗകര്യം നവീകരണത്തിന്‍റെ ഭാഗമായി ഒരുക്കിയിട്ടുണ്ട്​. കണ്ണൂർ ഗവ. ഗെസ്റ്റ്​ ഹൗസിന്​ പിറകിലായുള്ള പാർക്കിൽ കൂടുതൽ കോൺക്രീറ്റ്​ ഇരിപ്പിടങ്ങൾ സജ്ജമാക്കിയിട്ടുണ്ട്​. കുട്ടികളടക്കമുള്ള സഞ്ചാരികളെ ആകർഷിക്കാനായി മനോഹരമായ കോൺക്രീറ്റ്​ ശിൽപങ്ങൾ, ഊഞ്ഞാലടക്കമുള്ള കളിയുപകരണങ്ങൾ എന്നിവ സജ്ജമാക്കിയിട്ടുണ്ട്​. 500 മീറ്റർ നീളമുള്ള നടപ്പാതയിൽ വൈദ്യുതി ലൈറ്റുകളും കടലിനോടഭിമുഖമായി ഇരിപ്പിടങ്ങൾ സ്ഥാപിക്കുന്ന പ്രവൃത്തിയും പൂർത്തിയായി. അവസാനഘട്ട മിനുക്കുപണികൾ മാത്രമാണ്​ ഇനി അവശേഷിക്കുന്നത്​. പൂമ്പാറ്റ, കൂൺ അടക്കമുള്ള കോൺക്രീറ്റ്​ ശിൽപങ്ങൾ കുട്ടികളെ ആകർഷിക്കും. ഊഞ്ഞാൽ, റൈഡർ തുടങ്ങിയ കളിയുപകരണങ്ങളും സ്ഥാപിച്ചു. കോൺ​ക്രീറ്റിൽ പണിത ചെസ്​ ബോർഡ്​ മാതൃക പാർക്കിന്‍റെ മുഖ്യ ആകർഷണങ്ങളിലൊന്നാണ്​. ലഘുഭക്ഷണശാല, ഐസ്ക്രീം പാർലർ എന്നിവയും ഒരുക്കും. പാർക്കിന്‍റെ പ്രവർത്തനസമയം ദീർഘിപ്പിക്കാനും തീരുമാനമുണ്ട്​. 10 രൂപയുണ്ടായിരുന്ന പ്രവേശന ഫീസും വർധിപ്പിക്കുമെന്ന്​ ഡി.ടി.പി.സി അധികൃതർ അറിയിച്ചു. നവീകരണം പൂർത്തിയായ പയ്യാമ്പലത്തെ കുട്ടികളുടെ പാർക്കിനോടൊപ്പം തന്നെ സീ വ്യൂ പാർക്കും തുറക്കാനാണ്​ നീക്കം.