അനുഭവസാക്ഷ്യത്തിന്‍റെ രേഖപ്പെടുത്തലായി അർബുദ ജേതാക്കളുടെ സംവാദം

തലശ്ശേരി: ജീവിതം കൈവിട്ടുപോയിടത്തുനിന്ന്​​ തിരിച്ചുപിടിച്ച സന്തോഷത്തിലായിരുന്നു അവർ. ഒട്ടേറെ പേരുടെ ജീവനും ജീവിതവും പാതിവഴിയിൽ തീർക്കുന്ന അർബുദത്തെ അതിജീവിച്ച അനുഭവങ്ങളാണ്​ അവർക്ക്​ പുതുതലമുറക്കായി പങ്കുവെക്കാനുണ്ടായിരുന്നത്​. ​അർബുദം പിടിപെട്ടാൽ ജീവിതം തീർന്നെന്ന്​ വിധിയെ പഴിച്ച്​ കഴിയുന്നതിനുപകരം ആത്​മവിശ്വാസം മുറുകെപ്പിടിച്ച്​ ജീവിതത്തെ തിരിച്ചുപിടിക്കാനുള്ള വഴികാട്ടിയായി, ലോക അർബുദ ദിനാചരണത്തിന്‍റെ ഭാഗമായി മലബാർ കാൻസർ സെന്‍റർ സംഘടിപ്പിച്ച സംവാദം. സെന്‍ററിലെ വിവിധ ചികിത്സ വിഭാഗങ്ങളിൽ ചികിത്സ തേടി രോഗത്തെ മറികടന്ന്​ മികച്ച രീതിയിൽ ജീവിതം മുന്നോട്ടുകൊണ്ടുപോകുന്ന വ്യക്​തികളുമായുള്ളതായിരുന്നു സംവാദം. കോവിഡ്​ മാനദണ്ഡങ്ങൾ പാലിച്ച്​ നടത്തിയ പരിപാടിയിൽ 12 പേർ നേരിട്ടും മറ്റുള്ളവർ ഓൺലൈനിലുമാണ്​ പ​​ങ്കെടുത്തത്​. പീഡിയാട്രിക്​ ഓ​ങ്കോളജി ഹാളിൽ നടന്ന സംവാദത്തിന്​ ഡയറക്ടർ ഡോ. സതീശൻ ബാലസുബ്രഹ്മണ്യം നേതൃത്വം നൽകി. തേജസ്​ ഗ്രൂപ്പിൽ നിന്ന്​ സജിത, പങ്കജാക്ഷി, നവജീവനെ പ്രതിനിധാനംചെയ്ത്​​ പ്രകാശൻ, സ്പന്ദനം ഗ്രൂപ്പിനെ പ്രതിനിധാനംചെയ്ത്​​ ​ രതി, ശിവജി, നവധ്വനി ഗ്രൂപ്പിനെ പ്രതിനിധാനംചെയ്ത്​​ ശ്രീജിത്ത്​ എന്നിവർ സംസാരിച്ചു. ഓൺലൈനിൽ കോയമ്പത്തൂരിൽ നിന്ന്​ സബിനേഷും തിരൂരിൽ നിന്ന്​ ബീനയും രക്ഷകർത്താക്കളുടെ പ്രതിനിധിയായി മുഹമ്മദലി മാസ്റ്ററും പുഷ്പ ആന്‍റണിയും പ​ങ്കെടുത്തു. ഡോ. ആദർശ്​ ധർമരാജൻ, ഡോ. രവീണ ആർ. നായർ എന്നിവർ വിഷയാവതരണം നടത്തി. ഡോ. സൈന സുനിൽ കുമാർ, ഡോ. ബിജി, ഹോസ്പിറ്റൽ അഡ്​മിനിസ്​ട്രേറ്റർ അനിത എന്നിവർ വിവിധ വിഷയങ്ങളിൽ മറുപടി നൽകി.