ഹോപ്പേഴ്സ്, സീഹോക്ക് ക്രിക്കറ്റ് ക്ലബുകൾക്ക് ജയം

തലശ്ശേരി: ജില്ല ബി ഡിവിഷൻ ലീഗ് ക്രിക്കറ്റ് ചാമ്പ്യൻഷിപ്പിൽ തലശ്ശേരി ഹോപ്പേഴ്സ് ക്രിക്കറ്റ് ക്ലബ് ഒമ്പത് റൺസിന് മുഴപ്പിലങ്ങാട് വി.പി.ആർ ക്ലബിനെ പരാജയപ്പെടുത്തി. ആദ്യം ബാറ്റ് ചെയ്ത ഹോപ്പേഴ്സ് ക്രിക്കറ്റ് ക്ലബ് നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 116 റൺസെടുത്തു. മറുപടിയായി വി.പി.ആർ ക്ലബ് 18.4 ഓവറിൽ 107 റൺസിന് ഓൾ ഔട്ടായി. മൂന്ന് വിക്കറ്റ് വീഴ്ത്തി ഹോപ്പേഴ്സ് ക്രിക്കറ്റ് ക്ലബ് താരം റനിത്ത് മാൻ ഓഫ് ദി മാച്ചായി. രണ്ടാം മത്സരത്തിൽ ധർമടം സീഹോക്ക് ക്രിക്കറ്റ് ക്ലബ് ഏഴ് റൺസിന് തലശ്ശേരി ജനുവിൻ ഗെയ്സ് ക്രിക്കറ്റ് ക്ലബിനെ പരാജയപ്പെടുത്തി. ആദ്യം ബാറ്റ് ചെയ്ത സീഹോക്ക് ക്രിക്കറ്റ് ക്ലബ് നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 116 റൺസെടുത്തു. മറുപടിയായി ജനുവിൻ ഗെയ്സ് ക്രിക്കറ്റ് ക്ലബ് നിശ്ചിത 20 ഓവറിൽ എട്ട് വിക്കറ്റ് നഷ്ടത്തിൽ 109 റൺസെടുത്തു. മൂന്ന് വിക്കറ്റ് വീഴ്ത്തി സീഹോക്ക് ക്രിക്കറ്റ് ക്ലബ് താരം ജിബിൻ ജയൻ മാൻ ഓഫ് ദി മാച്ചായി. ശനിയാഴ്ച നടക്കുന്ന മത്സരത്തിൽ തലശ്ശേരി മലബാർ അത്​ലറ്റിക് ക്ലബ് തിരുവങ്ങാട് ഫിനിക്സ് ക്രിക്കറ്റ് ക്ലബിനെയും മുഴപ്പിലങ്ങാട് വി.പി.ആർ ക്ലബ് കണ്ണൂർ കമ്പിൽ അപ്പാച്ചി ക്രിക്കറ്റ് ക്ലബിനെയും നേരിടും.