തരംഗമായി 'ഞങ്ങളിടം'

തലശ്ശേരി: തലശ്ശേരിക്കാരിയായ ഗായിക സിമ്യ ഹംദൻ കൂട്ടുകാർക്കൊപ്പം പാടിയ പാട്ട് നവമാധ്യമങ്ങളിൽ വൈറലാവുന്നു. പാലക്കാട് ചെമ്പൈ സ്മാരക ഗവ. സംഗീത കോളജിലെ 2008-11 ബാച്ചിലെ സംഗീത വിദ്യാർഥികൾ ഒരുക്കിയ 'ഞങ്ങളിടം' വീഡിയോ ആൽബം യൂട്യൂബിൽ നാല് ദിവസം കൊണ്ട് 8000ത്തിൽപരം പേരാണ് കണ്ടത്. പഠിച്ചിരുന്ന കലാലയത്തിൽ പൂർവ വിദ്യാർഥി സംഗമത്തിന്‍റെ ഭാഗമായി തയാറാക്കിയതാണ് സംഗീത ആൽബം. 11 വർഷത്തിനുശേഷം നടന്ന പുന:സമാഗമം അവിസ്മരണീയമാക്കാനുള്ള തീരുമാനമാണ് ഈ മനോഹര ഗാനത്തിന്‍റെ പിറവിക്ക് പിന്നിൽ. സിമ്യ ഹംദനോടൊപ്പം സിധേഷ് കൃഷ്ണൻ, മിത്യ മിഥുൻ എന്നിവരാണ് ഗാനം ആലപിച്ചിട്ടുള്ളത്. 2008-11 ബാച്ചിലെ വിദ്യാർഥികൾ മാത്രം അഭിനയിച്ച ആൽബം സംവിധാനം ചെയ്തത് നവാഗതനായ നിധിൻ ആനന്ദാണ്. പ്രദീപ് പുതുശ്ശേരി ഛായാഗ്രഹണം നിർവഹിച്ചു. സുമീഷ് ഗംഗാസുന്ദറിന്‍റെ വരികൾക്ക് അജിത് ഭവാനി സംഗീതം നൽകി. സിധേഷ് കൃഷ്​ണനാണ് പശ്ചാത്തല സംഗീതം. എഡിറ്റിങ്​ ശ്രീജിത് വിജയൻ. മില്ലേനിയം വിഡിയോസിന്‍റെ യൂട്യൂബ് ചാനലിലാണ് ഇത് റിലീസ് ചെയ്തിട്ടുള്ളത്. മാപ്പിളപ്പാട്ടുകളടക്കം നിരവധി ഗാനങ്ങൾ ആലപിച്ചിട്ടുണ്ട് തലശ്ശേരിക്കാരി സിമ്യ ഹംദൻ. ------------- പടം..... 'ഞങ്ങളിടം' വിഡിയോ ആൽബത്തിൽ സിമ്യ ഹംദൻ കൂട്ടുകാർക്കൊപ്പം