കീച്ചേരിയിലെ ആൽമര മുത്തശ്ശിക്ക് മഴുവീണു

കീച്ചേരി: കണ്ണൂർ -തളിപ്പറമ്പ് ദേശീയപാതക്കരികിൽ കീച്ചേരിയിലെ കൂറ്റൻ ആൽമര മൂത്തശ്ശിക്ക് വികസനത്തിന്റെ മഴുവീണു. സ്വാതന്ത്ര്യസമര കാലഘട്ടത്തിലും അതിനുമുമ്പും ജനങ്ങളുടെ പ്രിയപ്പെട്ട തണല്‍മരമായിരുന്നു ഈ ആൽമരം. സ്വാതന്ത്ര്യസമര തീച്ചൂളയിൽ നിരവധി സമരങ്ങൾക്ക്​ തുടക്കമിട്ടതും ജനക്കൂട്ടം ഒത്തുകൂടി നിരവധി വിഷയങ്ങൾക്ക്​ തീരുമാനമെടുത്തതും ഇതേ ആൽമര ചുവട്ടിലായിരുന്നു. ദേശീയ പാത വികസനത്തിന്റെ ഭാഗമായി ആൽമരവും ഞായറാഴ്ചയാണ് മുറിച്ചുതുടങ്ങിയത്. മൊറാഴ സംഭവം, ഉപ്പുസത്യഗ്രഹം, നിരവധി പ്രക്ഷോഭങ്ങൾ എന്നിവക്കെല്ലാം മൂകസാക്ഷിയാണ് കീച്ചേരിയിലെ മരമുത്തശ്ശി. സ്വാതന്ത്ര്യസമരം കത്തിപ്പടരുന്ന 1920 -1947 കാലഘട്ടത്തിൽ മഹാരഥന്മാരായ സ്വാതന്ത്ര്യസമര നേതാക്കളുടെ കൂടിച്ചേരലുകളുടെ കേന്ദ്രമായിരുന്നു ആൽമര ചുവട്. ബ്രിട്ടീഷ് സാമ്രാജ്യത്വം രണ്ടാം ലോകയുദ്ധത്തിൽ ഇന്ത്യയെ പങ്കാളിയാക്കിയതിൽ പ്രതിഷേധിച്ച് കേരള പ്രദേശ്‌ കോൺഗ്രസ്​ കമ്മിറ്റിയുടെ ആഹ്വാന പ്രകാരം 1940 സെപ്​റ്റംബർ 15ന് സാമ്രാജ്യത്വ വിരുദ്ധദിനമായി ആചരിക്കാൻ തീരുമാനിച്ചിരുന്നു. നിരോധനം ലംഘിച്ചു കീച്ചേരിയിൽ കെ.പി.ആർ. ഗോപാലന്‍റെ നേതൃത്വത്തിൽ വൻ പൊതുയോഗം ചേരാൻ തീരുമാനിച്ചു. അഞ്ചാം പീടികയിലേക്ക് പൊതുയോഗം മാറ്റിയെങ്കിലും സമര ഭടന്മാർ കീച്ചേരിയിലെ ഈ ആൽമര ചുവട്ടിൽ സംഗമിച്ചാണ് അഞ്ചാംപീടികയിലേക്ക് നീങ്ങിയത്. പയ്യന്നൂരിൽ നടന്ന ഉപ്പുനിയമലംഘന പരിപാടിയിൽ പങ്കെടുക്കാൻ തിരിച്ച കെ. കേളപ്പന്റെ നേതൃത്വത്തിലുള്ള സത്യഗ്രഹികളുടെ സംഘം വിശ്രമിക്കാൻ തങ്ങിയതും ഈ ആൽമര ചുവട്ടിലാണ്​.