മൂല്യങ്ങൾ ചോരാതെ ഖാദിയെ സംരക്ഷിക്കും -പി. ജയരാജൻ

പയ്യന്നൂർ: മൂല്യം സംരക്ഷിച്ചുകൊണ്ടുതന്നെ വൈവിധ്യം വരുത്തി ഖാദിയെ സംരക്ഷിക്കുമെന്ന് ഖാദി ബോർഡ് വൈസ് ചെയർമാൻ പി. ജയരാജൻ. കണ്ടോത്ത് ഖാദി കേന്ദ്രം സന്ദർശിച്ച ശേഷമാണ് അദ്ദേഹം ഇക്കാര്യം വ്യക്തമാക്കിയത്. തൊഴിലാളികൾക്കുള്ള കുടിശ്ശിക തുക ഉടൻ കൊടുത്തു തീർക്കും. ഖാദി മേഖലക്ക്​ പ്രചാരം വർധിക്കുന്ന സാഹചര്യമാണിപ്പോഴെന്നും പി. ജയരാജൻ പറഞ്ഞു. ഖാദി ബോർഡ് ഡയറക്ടർ കെ.കെ. ചാന്ദിനി, പയ്യന്നൂർ ഖാദി കേന്ദ്രം ഡയറക്ടർ ടി.സി. മാധവൻ നമ്പൂതിരി, ജൂനിയർ സൂപ്രണ്ടുമാരായ വി. ഷിബു, ടി.വി. വിനോദ് കുമാർ, കെ. പവിത്രൻ എന്നിവർ ഒപ്പമുണ്ടായിരുന്നു.