നാടൊരുമ്പെട്ടാൽ തെളിനീരൊഴുകും

പടങ്ങൾ: ഗിരീഷ് ​ കണ്ണൂർ: മഴ വിട്ടൊഴിഞ്ഞതോടെ ജില്ലയിൽ ചൂടു​ കനക്കുകയാണ്​. കുളങ്ങൾ അടക്കമുള്ള ജലാശയങ്ങളിൽ മാലിന്യം കുമിഞ്ഞുകൂടി​. ജലസ്രോതസ്സുകൾ സംരക്ഷിക്കാനുള്ള ബോധവത്​കരണങ്ങളും പ്രചാരണങ്ങളും മുറക്ക് നടക്കുന്നുണ്ടെങ്കിലും സംരക്ഷണ പ്രവർത്തനങ്ങൾ മിക്കതും കടലാസിൽ ഒതുങ്ങുകയാണ്​. തദ്ദേശ സ്ഥാപനങ്ങൾ, ഇറിഗേഷൻ വകുപ്പ്​ എന്നിവയുടെ നേതൃത്വത്തിലുള്ള പൊതുജല സ്രോതസ്സുകളുടെ സംരക്ഷണ പ്രവർത്തനങ്ങൾ മിക്കയിടത്തും പേരിനുമാത്രമാണ്​. വരാനിരിക്കുന്ന വേനൽകാലത്തിനുള്ളിൽ മാലിന്യം നീക്കി സംരക്ഷണ പ്രവർത്തനങ്ങൾ നടപ്പായില്ലെങ്കിൽ നാട്​ കടുത്ത വരൾച്ചയിലേക്ക്​ നീങ്ങും. കാനാമ്പുഴ നദിയുടെ പുനരുജ്ജീവനമടക്കം എങ്ങുമെത്തിയില്ല​. കാപ്പാട് പെരിങ്ങളായി നീർത്തട മേഖലയിൽ 1.86 കോടിയുടെ പദ്ധതിക്ക് രണ്ടു വർഷം മുമ്പ്​ സാ​​ങ്കേതിക അനുമതി ലഭിച്ചിരുന്നു. ഇറിഗേഷൻ വകുപ്പിന്‍റെ നേതൃത്വത്തിൽ അരികുകെട്ടലടക്കമുള്ള പ്രവൃത്തി നടന്നെങ്കിലും പുഴയിൽ ഇപ്പോഴും മാലിന്യം നിറഞ്ഞിരിക്കയാണ്​. കക്കാട്​ പുഴ, കുപ്പം പുഴ, ചിറക്കൽ ചിറ എന്നിവയുടെയെല്ലാം സ്ഥിതി പരിതാപകരമാണ്​. ഒരുകാലത്ത്​ പ്രതാപം വിളിച്ചോതിയ ചിറക്കൽ ചിറയിൽ മണ്ണ് നിറഞ്ഞ്​ ഉപയോഗശൂന്യമായിരിക്കയാണ്​. ഹരിത കേരള മിഷൻ, ശുചിത്വ മിഷൻ എന്നിവയുടെ നേതൃത്വത്തിൽ ജലസംരക്ഷണ ബോധവത്ക​രണ പ്രവർത്തനങ്ങൾ ഊർജിതമാണ്​. എന്നാൽ, തദ്ദേശ സ്ഥാപനങ്ങൾ ഫലപ്രദമായ നടപടി സ്വീകരിക്കാത്തതാണ്​ പ്രതിസന്ധിക്ക്​ കാരണം. പുഴകൾക്കു​ പുറമെ ജില്ലയിലെ തോടുകളിൽ മിക്കതും പ്ലാസ്റ്റിക്​ മാലിന്യം കുമിഞ്ഞ്​ ഒഴുക്ക്​ നിലച്ചിരിക്കയാണ്​. .............................................................................. മൂന്നു​ വീതം കുളങ്ങൾ സംരക്ഷിക്കാൻ നടപടി വരൾച്ച മുന്നിൽ കണ്ട്​ ചില നഗരസഭകളുടെയും പഞ്ചായത്തുകളുടെയും കണ്ണൂർ കോർപറേഷന്‍റെയും നേതൃത്വത്തിൽ ജലസ്രോതസ്സുകൾ സംരക്ഷിക്കാൻ നടപടിയെടുക്കും. ഈ വർഷത്തെ കേന്ദ്ര ധനകമീഷൻ വിഹിതം ഉപയോഗിച്ച് അതത്​ തദ്ദേശ സ്ഥാപനത്തിലെ മൂന്നു വീതം കുളങ്ങൾ പുനരുദ്ധരിക്കാനായിരിക്കും തുക വിനിയോഗിക്കുക. കൂത്തുപറമ്പ്, തലശ്ശേരി, മട്ടന്നൂർ, പാനൂർ, തളിപ്പറമ്പ, പയ്യന്നൂർ നഗരസഭകളിലെ കുളങ്ങളായിരിക്കും ശുചീകരിക്കുക. കോട്ടയം, പാട്യം, കുന്നോത്തുപറമ്പ്​, ചിറ്റാരിപ്പറമ്പ്​, മാങ്ങാട്ടിടം, കീഴല്ലൂർ, കൂടാളി, കതിരൂർ, മൊകേരി, ചൊക്ലി, പന്ന്യന്നൂർ, എരഞ്ഞോളി, ന്യൂമാഹി, പിണറായി, ധർമടം, വേങ്ങാട്, അഞ്ചരക്കണ്ടി, മുഴപ്പിലങ്ങാട്, അഴീക്കോട്‌, ചിറക്കൽ, പാപ്പിനിശ്ശേരി, വളപട്ടണം, ചെറുതാഴം, ഏഴോം, മാടായി, ചെറുകുന്ന്​, കണ്ണപുരം, കല്യാശ്ശേരി, നാറാത്ത്​, ചെമ്പിലോട്, മുണ്ടേരി, കടമ്പൂർ, പെരളശ്ശേരി, കൊളച്ചേരി, കടന്നപ്പള്ളി, പാണപ്പുഴ, കുറുമാത്തൂർ, പരിയാരം, കുഞ്ഞിമംഗലം, കരിവെള്ളൂർ, പെരളം, കുറ്റിയാട്ടൂർ, മയ്യിൽ, ഇരിക്കൂർ തുടങ്ങിയ പഞ്ചായത്തുകളിലെ കുളങ്ങളും സംരക്ഷിക്കും. .............................................................................. തോട്​ സഭകൾ ഊർജിതം പ്ലാസ്റ്റിക്​ മാലിന്യം കുമിഞ്ഞുകൂടിയ തോടുകളുടെ ഒഴുക്ക്​ വീണ്ടെടുക്കാനുള്ള പ്രവർത്തനങ്ങളുമായി ബന്ധപ്പെട്ട് ഹരിത കേരള മിഷൻ സജീവമായി ഇടപെടുന്നുണ്ടെന്ന്​ ജില്ല കോഓഡി​നേറ്റർ ഇ.കെ. സോമശേഖരൻ അറിയിച്ചു. തോടുകളെ കണ്ടെത്തി ശുചീകരിക്കാനുള്ള 'ഇനി ഞാൻ ഒഴുകട്ടെ' പദ്ധതി വീണ്ടും സജീവമാക്കും. ഇതിനായി വിവിധ പഞ്ചായത്തുകളിൽ തോട്​ സഭകളുടെ പ്രവർത്തനം ഊർജിതമാണ്​. മലിനീകരണ നിയന്ത്രണ ബോർഡ്​, ഹരിത കേരള മിഷൻ, ശുചിത്വ മിഷൻ എന്നിവയുടെ നേതൃത്വത്തിൽ ജല മലിനീകരണ സർവേ ആരംഭിച്ചിരിക്കയാണ്​. കുപ്പം പുഴയിലെ മാലിന്യത്തെപ്പറ്റി പഠനം നടത്തിയെന്നും ഇതുസംബന്ധിച്ച റിപ്പോർട്ട്​ ഉടൻ അധികൃതർക്ക്​ കൈമാറുമെന്നും അദ്ദേഹം പറഞ്ഞു.