ഭാര്യയെ കഴുത്തറുത്ത് കൊലപ്പെടുത്തിയ സംഭവം: പ്രതിയുമായി തെളിവെടുപ്പ്

പെരിങ്ങത്തൂർ: പുല്ലൂക്കരയിൽ കഴിഞ്ഞദിവസം ഭാര്യയെ കഴുത്തറുത്ത് കൊലപ്പെടുത്തിയ കേസിലെ പ്രതി സി. മോഹനനെ (61) ചൊക്ലി പൊലീസ് കസ്റ്റഡിയിൽ വാങ്ങി തെളിവെടുത്തു. ചൊക്ലി പൊലീസ് ഇൻസ്പെക്ടർ സി. ഷാജുവി​ന്‍റെ നേതൃത്വത്തിലായിരുന്നു തെളിവെടുപ്പും ചോദ്യംചെയ്യലും. കൊല നടത്തിയ വീട്ടിലെത്തിച്ചാണ്​ തെളിവെടുപ്പ്​ നടത്തിയത്​. ഭാര്യ രതിയെ കൊല്ലാൻ ഉപയോഗിച്ച കത്തി വാങ്ങിയ കടവത്തൂരിലെ കടയിലെത്തിച്ചും തെളിവെടുത്തു. കടയുടമ മോഹനനെ തിരിച്ചറിഞ്ഞു. ഭാര്യയും മക്കളും അവഗണിച്ചതാണ് കൊലപാതക കാരണമെന്ന് പ്രതി പൊലീസിനോട് വെളിപ്പെടുത്തി. ചെയ്തതിൽ കുറ്റബോധം ഉണ്ടെന്നും പറഞ്ഞു. ശാസ്ത്രീയ തെളിവുകൾ ശേഖരിക്കുന്നതി​ന്‍റെ ഭാഗമായി മോഹന​ന്‍റെ രക്തസാമ്പിളും തലമുടിയും പൊലീസ് ശേഖരിച്ചു. രണ്ട് ദിവസത്തെ കസ്റ്റഡി കാലാവധി കഴിഞ്ഞ് തലശ്ശേരി ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ തിരികെ ഹാജരാക്കി. പ്രതിയെ കോടതി കണ്ണൂർ ജയിലിലേക്ക് മാറ്റി.