ഗർഭാശയഗള-സ്തനാർബുദ പരിശോധന മെഗാ ക്യാമ്പ്

തലശ്ശേരി: മലബാർ കാൻസർ കെയർ സൊസൈറ്റി തലശ്ശേരി റോട്ടറി ക്ലബി‍ൻെറ സഹകരണത്തോടെ കുട്ടിമാക്കൂലിൽ ഗർഭാശയഗള, സ്തനാർബുദ പരിശോധനക്കായി മെഗാ ക്യാമ്പ് സംഘടിപ്പിക്കും. തലശ്ശേരിയിലും പരിസരങ്ങളിലുമുള്ളവർക്ക്​ വെള്ളിയാഴ്ച വിശദ പരിശോധനകൾക്ക് വിധേയമാവാമെന്ന് സംഘാടകർ അറിയിച്ചു. സ്ത്രീകളിൽ ഏറ്റവും കൂടുതൽ കണ്ടുവരുന്നതും ലക്ഷണങ്ങൾ നേരത്തേ കണ്ടെത്തിയാൽ ചികിത്സിച്ച് പൂർണമായി സുഖപ്പെടുത്താൻ സാധിക്കുന്നതുമാണ് ഗർഭാശയഗള - സ്തനാർബുദം. കാൻസറി‍ൻെറ വിദൂര സാധ്യതകൾപോലും തിരിച്ചറിയാൻ ഉപകരിക്കുന്ന അത്യാധുനിക ഉപകരണങ്ങൾ ക്യാമ്പിൽ പരിശോധനക്ക്​ ഉപയോഗിക്കുന്നുണ്ട്‌. രാവിലെ കുട്ടിമാക്കൂൽ ശ്രീനാരായണ ധർമ പ്രകാശിനി വായനശാലയിൽ തലശ്ശേരി സബ് കലക്ടർ അനുകുമാരി ഉദ്ഘാടനം നിർവഹിക്കും. ഐ.എം.എ പ്രസിഡന്‍റ്​ ഡോ. മിനി ബാലകൃഷ്ണൻ വിശിഷ്ടാതിഥിയാകും. വാർത്തസമ്മേളനത്തിൽ മേജർ പി. ഗോവിന്ദൻ, കെ.കെ. സന്തോഷ് കുമാർ, സി. സോമൻ, ഐ. അനിത, ടി.എം. ദിലീപ് കുമാർ, എം.പി. ശ്യാം, പി. റാജിബ് റുസ്തം എന്നിവർ പങ്കെടുത്തു.