പയ്യന്നൂർ താലൂക്കിലെ ഭൂപ്രശ്നങ്ങൾക്ക് നടപടി

പയ്യന്നൂർ: പയ്യന്നൂർ താലൂക്കിലെ ഭൂപ്രശ്നങ്ങൾ പരിഹരിക്കാൻ നടപടികൾ സ്വീകരിച്ചുവരുന്നതായി വ്യാഴാഴ്ച നടന്ന താലൂക്ക് വികസന സമിതി യോഗത്തിൽ പയ്യന്നൂർ തഹസിൽദാർ കെ. ബാലഗോപാലൻ അറിയിച്ചു. പതിച്ചുകൊടുത്ത മിച്ചഭൂമി പ്രത്യേക സർവേ സംഘത്തെ നിയോഗിച്ച് അളന്നുകൊടുക്കുന്നത്​ പുരോഗമിച്ചുവരുന്നുണ്ട്. മിച്ചഭൂമി കൈയേറി താമസിക്കുന്ന അർഹരായ 11 കുടുംബങ്ങൾക്ക് പട്ടയം നൽകാൻ ഉത്തരവായി. താലൂക്ക് പരിധിയിലെ മിച്ചഭൂമി പ്രശ്നങ്ങൾക്ക് അടിയന്തരമായി പരിഹാരം കാണാൻ നിർദേശം നൽകിയതായും തഹസിൽദാർ അറിയിച്ചു. അസംഘടിത തൊഴിലാളികൾക്കുള്ള രജിസ്ട്രേഷൻ പ്രവർത്തനം പുരോഗമിക്കുന്നുണ്ട്​. അക്ഷയ കേന്ദ്രങ്ങളിൽക്കൂടി സൗജന്യമായി രജിസ്ട്രേഷൻ ചെയ്യാമെന്നും അസി. ലേബർ ഓഫിസർ അറിയിച്ചു. പൊതുമരാമത്ത് വകുപ്പി​ൻെറ കീഴിലുള്ള പയ്യന്നൂർ - അന്നൂർ റോഡ്​, സ്വാമിമുക്ക് പുത്തൂർ റോഡ്​ എന്നിവയുടെ പ്രവൃത്തി ഇഴഞ്ഞുനീങ്ങുന്നതിൽ പ്രതിനിധികൾ ആശങ്കയറിയിച്ചു. അടിയന്തര നടപടി സ്വീകരിക്കുമെന്ന്​ റോഡ് വിഭാഗം അസി. എൻജിനീയർ ഉറപ്പുനൽകി. ടി.ഐ. മധുസൂദനൻ എം.എൽ.എ അധ്യക്ഷത വഹിച്ചു. എം. വിജിൻ എം.എൽ.എ, പയ്യന്നൂർ നഗരസഭ ചെയർപേഴ്സൻ കെ.വി. ലളിത, ബ്ലോക്ക് പഞ്ചായത്ത് പ്രസിഡൻറ്​ പി.വി. വത്സല, താലൂക്ക് പരിധിയിലെ പഞ്ചായത്ത് പ്രസിഡൻറുമാർ, ജനപ്രതിനിധികൾ, രാജ്മോഹൻ ഉണ്ണിത്താൻ എം.പിയുടെ പ്രതിനിധി, രാഷ്​ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.