ചെ​ങ്കൊടി ഉയർന്നു; സി.പി.എം ജില്ല സമ്മേളനത്തിന്​ തുടക്കം

പ്രതിനിധി സമ്മേളനം ഇന്ന്​ മുഖ്യമന്ത്രി പിണറായി ഉദ്​ഘാടനം ചെയ്യും പഴയങ്ങാടി: ചെ​ങ്കൊടിയെ നെഞ്ചേറ്റിയ കണ്ണൂരി​ൻെറ മണ്ണിൽ സി.പി.എം ജില്ല സമ്മേളനത്തിന്​ തുടക്കം. ഔപചാരിക തുടക്കം കുറിച്ച്​ എരിപുരത്ത്​ സമ്മേളന നഗരിയിൽ ചെ​ങ്കൊടി ഉയർന്നു. പ്രതിനിധി സമ്മേളനം വെള്ളിയാഴ്​ച രാവിലെ 10ന്​ മാടായി കോഓപറേറ്റിവ് റൂറൽ ബാങ്ക് ഓഡിറ്റോറിയത്തിലെ കെ. കുഞ്ഞപ്പ, പി. വാസുദേവൻ നഗറിൽ മുഖ്യമന്ത്രി പിണറായി വിജയൻ ഉദ്​ഘാടനം​ ചെയ്യും. മൂന്നുദിവസം നീളുന്ന സമ്മേളനത്തിൽ പിണറായി വിജയന്​ പുറമെ സംസ്​ഥാന ​സെ​ക്രട്ടറി കോടിയേരി ബാലകൃഷ്ണൻ, എ. വിജയരാഘവൻ, ഇ.പി. ജയരാജൻ, എം.വി. ഗോവിന്ദൻ, പി.കെ. ശ്രീമതി, കെ.കെ. ശൈലജ, പി. കരുണാകരൻ, ആനത്തലവട്ടം ആനന്ദൻ എന്നിവർ മുഴുവൻ സമയവും പങ്കെടുക്കും. കരിവെള്ളൂർ രക്തസാക്ഷി നഗറിൽ നിന്ന്​ തുടക്കം കുറിച്ച പതാകജാഥയും കാവുമ്പായി സമരഭൂമിയിൽനിന്ന്​ തുടങ്ങിയ കൊടിമരജാഥയും കണ്ണൂർ എ.കെ.ജി സ്​ക്വയറിൽ നിന്നാരംഭിച്ച ദീപശിഖ റാലിയും വിവിധ കേന്ദ്രങ്ങളിലെ സ്വീകരണത്തിനു ശേഷം വ്യാഴാഴ്​ച വൈകീട്ട് അ​ഞ്ചോടെ എരിപുരത്ത് സമന്വയിച്ചു. ശേഷം സംഘാടകസമിതി ചെയർമാൻ ടി.വി. രാജേഷ് പൊതുസമ്മേളന നഗരിയിൽ പതാക ഉയർത്തി. 38 വനിതകളടക്കം 319 അംഗങ്ങളാണ്​ പ്രതിനിധി സമ്മേളനത്തിൽ പങ്കെടുക്കുന്നത്​. കോവിഡ്​ നിയന്ത്രണം കാരണം ഇക്കുറി ​സമ്മേളനത്തി​ൻെറ ഭാഗമായുള്ള റാലി ഒഴിവാക്കി. സമാപന സമ്മേളനം 12ന്​ വൈകീട്ട്​ നാലിന്​ പഴയങ്ങാടിയിലാണ്​ നടക്കുക. ജില്ല സമ്മേളനങ്ങളിൽ ആദ്യത്തേതാണ്​ കണ്ണൂർ. ഏപ്രിലിൽ കണ്ണൂരിൽ പാർട്ടി കോൺഗ്രസ്​ നടക്കുന്നതിനാൽ അതിനുള്ള ഒരുക്കത്തിന്​​ സമയം കണക്കാക്കിയാണ്​ ഇവിടെ ജില്ല സമ്മേളനം നേരത്തേയാക്കിയത്​. സമ്മേളനം ആഘോഷമാക്കുകയാണ്​ മേഖലയിലെ പാർട്ടി പ്രവർത്തകർ. പ്രചാരണ ബോർഡുകളും കട്ടൗട്ടുകളും കൊടികളും അലങ്കാരങ്ങളും കൊണ്ട് ഊടുവഴികളും നാട്ടുപാതകളും നഗരവും ചുവപ്പണിഞ്ഞു​. സമ്മേളനത്തി​ൻെറ ഭാഗമായി വെള്ളിയാഴ്​ച വൈകീട്ട് അഞ്ചിന്​ പഴയങ്ങാടിയിൽ മാധ്യമ സെമിനാർ മന്ത്രി പി. രാജീവ് ഉദ്ഘാടനം ചെയ്യും. തുടർന്ന് കണ്ണൂർ ഷെരീഫ് നയിക്കുന്ന ഇശൽ വിരുന്നുണ്ടാവും. 11ന് വൈകീട്ട് അഞ്ചിന്​ മതനിരപേക്ഷ സെമിനാർ എ. വിജയരാഘവൻ ഉദ്ഘാടനം ചെയ്യും. ------------- വിമതശബ്​ദങ്ങളില്ല; സി.പി.ഐയുടെ ​പ്രകോപനം ചർച്ചയാകും കണ്ണൂർ: സി.പി.എം താഴെത്തട്ടിൽ സമ്മേളനം പൂർത്തിയാക്കി ജില്ല സമ്മേളനത്തിലെത്തു​​മ്പോൾ പാർട്ടിയിൽ കാര്യമായ അപശബ്​ദങ്ങളില്ല. രണ്ടിടത്ത്​ മാത്രമാണ്​ വിമതശബ്​ദം ഉയർന്നത്​. തളിപ്പറമ്പ്​ മാന്ധംകുണ്ട്​, കണ്ണൂർ തായതെരു എന്നിവിടങ്ങളിൽ വിമതസ്വരമുയർത്തിയവർ പാർട്ടി വിട്ട്​ സി.പി.ഐയിൽ ചേർന്നു. ഇതേച്ചൊല്ലി സി.പി.എമ്മും സി.പി.ഐയും തമ്മിൽ ​കൊമ്പുകോർത്തിരിക്കുകയാണ്​. ജില്ല സമ്മേളന ചർച്ചയിൽ ഇക്കാര്യം പ്രധാന ചർച്ചാ​ വിഷയമാകും. മാന്ധംകുണ്ടിൽ പാർട്ടി മുൻ ഏരിയ കമ്മിറ്റിയംഗവും തളിപ്പറമ്പ്​ നഗരസഭ വൈസ്​ ചെയർമാനുമായിരുന്ന​ കോമത്ത്​ മുരളീധരനും കൂടെയുള്ള 57 പേരുമാണ്​ സി.പി.എം വിട്ട്​ സി.പി.ഐയിൽ ചേർന്നത്​. ഇവരെ സ്വീകരിച്ചതിൽ സി.പി.എം രോഷം പ്രകടിപ്പിച്ചെങ്കിലും സി.പി.ഐ അതൊന്നും പരിഗണിക്കുന്നില്ല. കണ്ണൂർ തായതെരുവിൽ സി.പി.എം വിട്ട മുൻ ലോക്കൽ​ ​സെക്രട്ടറി ടി.എം. ഇർഷാദ്​, മുൻബ്രാഞ്ച്​ ​സെക്രട്ടറി പി.കെ. ഷംസീർ എന്നിവർക്ക്​ ജില്ല സമ്മേളനത്തിന്​ തലേന്ന്​ സി.പി.​ഐയിൽ അംഗത്വം നൽകി ജില്ല കമ്മിറ്റി ഓഫിസിൽ സ്വീകരിച്ചത്​ അതി​ൻെറ സൂചനയാണ്​. ------------- എം.വി. ജയരാജൻ തുടർന്നേക്കും കണ്ണൂർ: ജില്ല സമ്മേളനം ഞായറാഴ്​ച സമാപിക്കു​​മ്പോൾ ജില്ല സെക്രട്ടറി സ്​ഥാനത്ത്​ എം.വി. ജയരാജൻ തുടരുമെന്നാണ്​ സൂചന. 2019ൽ ലോക്​സഭ തെരഞ്ഞെടുപ്പ്​ വേളയിൽ പി. ജയരാജനെ മാറ്റിയാണ്​ എം.വി. ജയരാജൻ ജില്ല സെക്രട്ടറിയായത്​. അതുവരെ തിരുവനന്തപുരത്ത്​ മുഖ്യമന്ത്രിയുടെ ഓഫിസ്​ ചുമതലയിലായിരുന്നു എം.വി. ജയരാജൻ. ലോക്​സഭാ തെരഞ്ഞെടുപ്പിൽ വടകരയിൽ മത്സരിക്കുന്നതി​ൻെറ പേരിലാണ്​ പി. ജയരാജനെ മാറ്റിയത്​. സ്വയം പുകഴ്​ത്തൽ ആക്ഷേപത്തിൽ പാർട്ടിയുടെ ശാസനക്ക്​ പാത്രമായ പി. ജയരാജനെ നേതൃത്വം പിറ​കോട്ടു വലിക്കുകയായിരുന്നുവെന്ന്​ അന്നുതന്നെ ചൂണ്ടിക്കാണിക്കപ്പെട്ടിരുന്നു. വടകരയിൽ ലോക്​സഭ അങ്കം പരാജയപ്പെട്ട പി. ജയരാജന്​ പിന്നീട്​ പാർട്ടിയിൽ കാര്യമായ ചുമതലകളൊന്നും നൽകപ്പെട്ടില്ല. 2018ൽ കണ്ണൂർ നായനാർ അക്കാദമിയിൽ നടന്ന ജില്ല സമ്മേളനത്തിൽ നിറഞ്ഞുനിൽക്കുകയും മൂന്നാമതും ജില്ല സെക്രട്ടറിയായി തെരഞ്ഞെടുക്കപ്പെടുകയും​ ചെയ്​ത പി. ജയരാജന്​ ഈ ജില്ല സമ്മേളനത്തിൽ കാര്യമായ റോൾ ഇല്ല. പാർട്ടി സംസ്​ഥാന കമ്മിറ്റിയംഗമായ അദ്ദേഹത്തെ ഈയിടെയാണ്​ ഖാദിബോർഡ്​ വൈസ്​ ചെയർമാൻ സ്​ഥാനത്ത്​ പിണറായി സർക്കാർ നിയോഗിച്ചത്​. അത്ര പ്രധാനമല്ലാത്ത സ്​ഥാ​നത്ത്​ മുതിർന്ന നേതാവി​ൻെറ നിയമനം പി. ജയരാജന്​ പാർട്ടിയിൽ കാര്യമായ ചുമതലകളിലേക്ക്​ ​മടക്കമില്ലെന്ന സൂചനയായാണ്​ വിലയിരുത്തപ്പെടുന്നത്​. ------------ വർധിച്ചത്​ 565 ബ്രാഞ്ചുകൾ; 13 എൽ.സി കണ്ണൂർ: സി.പി.എമ്മിന്​ കണ്ണൂർ ജില്ലയിൽ വർധിച്ചത്​ 565 ബ്രാഞ്ച്​ കമ്മിറ്റികൾ. ലോക്കൽ കമ്മിറ്റികളുടെ എണ്ണത്തിലും 13 എണ്ണത്തി​ൻെറ വർധനയുണ്ട്​. ജില്ലയിലെ ആകെ പാർട്ടി അംഗങ്ങളുടെ എണ്ണം ഇക്കുറി 6047 എണ്ണം വർധിച്ച്​ 61,688 ആയി ഉയർന്നു. സി.പി.എമ്മി​നെ സംബന്ധിച്ച്​ രാജ്യത്തെ ഏറ്റവും വലിയ ജില്ല ഘടകമാണ്​ കണ്ണൂർ. 18 ഏരിയ കമ്മിറ്റികൾക്ക്​ 243 ലോക്കൽ കമ്മിറ്റി, 4247​ ബ്രാഞ്ചുകളുമാണ്​ ജില്ലയിലുള്ളത്​. ഇതിനു പുറമെ അനുഭാവി ഗ്രൂപ്പുകളുമുണ്ട്​. വനിതകൾക്ക്​ കൂടുതൽ പ്രാതിനിധ്യം നൽകാൻ തീരുമാനിച്ചതോടെ നിലവിൽ ബ്രാഞ്ച്​ സെക്രട്ടറിമാരിൽ 167 പേർ വനിതകളാണ്​. വനിത ലോക്കൽ സെക്രട്ടറിമാരായി രണ്ടുപേരാണുള്ളത്​. ഏരിയ സെക്രട്ടറിമാരിൽ വനിതകളില്ല. 18 ഏരിയ സെക്രട്ടറിമാരിൽ ശ്രീകണ്​ഠപുരം, കൂത്തുപറമ്പ്​, തലശ്ശേരി, ആ​ലക്കോട്​ എന്നിവിടങ്ങളിൽ പുതുമുഖം വന്നപ്പോൾ ബാക്കി ഇടങ്ങളിൽ നേരത്തേയുണ്ടായിരുന്നവർ തുടരുകയാണ്​.