പ്രവാസികള്‍ക്ക് സ്വയംതൊഴില്‍ വായ്പ; അപേക്ഷ ക്ഷണിച്ചു

കണ്ണൂർ: ഒ.ബി.സി /മതന്യൂനപക്ഷ വിഭാഗത്തിൽപെട്ടവരും വിദേശത്ത് ജോലി നഷ്​ടപ്പെട്ട് തിരിച്ചെത്തിയവരുമായ പ്രവാസികളില്‍നിന്ന്​ സ്വയംതൊഴില്‍ ബിസിനസ് സംരംഭങ്ങള്‍ ആരംഭിക്കുന്നതിന് സംസ്ഥാന പിന്നാക്ക വിഭാഗ വികസന കോര്‍പറേഷന്‍ റീ ടേണ്‍ പദ്ധതിയില്‍ അപേക്ഷ ക്ഷണിച്ചു. കാര്‍ഷിക /ഉല്‍പാദന /സേവന മേഖലകളിലുള്ള ഏതു സംരംഭത്തിനും വായ്പ അനുവദിക്കും. സ്വയം തൊഴില്‍ കണ്ടെത്തുന്നതിന്​ വാഹനങ്ങള്‍ വാങ്ങുന്നതിനും വായ്പ ലഭിക്കും. പരമാവധി 30 ലക്ഷം രൂപ വരെ അനുവദിക്കും. തിരിച്ചടവ് കാലാവധി 84 മാസം വരെയാണ്​. 65 വയസ്സാണ്​ പ്രായപരിധി. നോര്‍ക്ക റൂട്ട്‌സ് ശിപാര്‍ശ ചെയ്യുന്ന പ്രവാസികള്‍ക്കാണ് വായ്പ അനുവദിക്കുക. കൂടുതല്‍ വിവരങ്ങള്‍ www.ksbcdc.comല്‍ ലഭിക്കും.