ലീലാമ്മയുടെ കൈയിലുണ്ട്; ​ ഇന്ത്യയുടെ 'വാർത്ത'കൾ

അബ്​ദുല്ല ഇരിട്ടി ഇരിട്ടി: പത്രവാർത്തകളും പ്രധാനസംഭവങ്ങളെ കുറിച്ചുള്ള വിവരങ്ങളും നിധിപോലെ കാത്തുസൂക്ഷിക്കുകയാണ് ഇരിട്ടി പേരട്ടയിലെ കളരിക്കൽ ലീലാമ്മ എന്ന വീട്ടമ്മ. 1947 ആഗസ്​റ്റ്​ 15ന്​ ഇന്ത്യക്ക് സ്വാതന്ത്യം ലഭിച്ച വാർത്ത ഉൾപ്പെടുന്ന ദിനപത്രം മുതൽ ഇന്നുവരെയുള്ള എല്ലാ പ്രധാന സംഭവങ്ങളുമടങ്ങിയ പത്രങ്ങളും ഈ വീട്ടമ്മയുടെ ശേഖരത്തിലുണ്ട്. 'ഇ.എം.എസ് വിടവാങ്ങി, മദർ തെരേസ അന്തരിച്ചു, ഡയാനയും കാമുകനും കാറപകടത്തിൽ മരിച്ചു, മൊറാർജി അന്തരിച്ചു, കാറപകടത്തിൽ മോനിഷ മരിച്ചു, രാജീവ്ഗാന്ധി കൊല്ലപ്പെട്ടു, നസീറിന് അശ്രുപൂജ, വിമാനം തകർന്ന്​ സഞ്ജയ് മരിച്ചു, ജോൺപോൾ മാർപാപ്പ കാലം ചെയ്തു, ടെസ്​റ്റ്​ ട്യൂബ് ശിശു പിറന്നു, മനുഷ്യൻ ചന്ദ്രനിൽ, അമേരിക്കൻ പ്രസിഡൻറ്​ കെന്നഡി വെടിയേറ്റ് മരിച്ചു' തുടങ്ങിയ തലക്കെട്ടുകൾ അതിൽ ചിലതുമാത്രം. കുട്ടിക്കാലം മുതലേ ലീലാമ്മക്ക്​ വായനയോട്​ വലിയ താൽപര്യമായിരുന്നു. അന്നുമുതൽ തന്നെ കിട്ടുന്ന പത്രങ്ങളെല്ലാം സൂക്ഷിച്ചുവെക്കുന്ന സ്വഭാവക്കാരിയാണ്​. കോട്ടയം പാലായിലെ ഉരളികുന്നത്തുനിന്നും 1970കളിൽ മലബാറിലേക്ക് വരുമ്പോൾ ഈ പത്രക്കെട്ടുകളും ഒപ്പം കൊണ്ടുവന്നു. കൂടാതെ പത്രങ്ങളുടെ ചരമ പേജുകൾ പ്രത്യേക ആൽബങ്ങളാക്കി സൂക്ഷിക്കുകയും ചെയ്​തിട്ടുണ്ട്​. ഇത്തരത്തിൽ നാല്​ ആൽബങ്ങൾ തന്നെയുണ്ട് ലീലാമ്മയുടെ കൈയിൽ. പത്രശേഖരണത്തിന്​ പിന്തുണയുമായി ഭർത്താവ് തോമസും കൂടെയുണ്ട്. താങ്ങായി അഞ്ചുമക്കളും. പൊന്നുപോലെ കൊണ്ടുനടന്ന പത്രക്കെട്ടുകൾ തലമുറകളായി കൈമാറിപ്പോരാനാണ് ലീലാമ്മക്ക്​ ഇഷ്​ടം. പുതുതലമുറക്ക് അറിവുകളുടെ ശേഖരമൊരുക്കി മാതൃക കൂടിയാവുകയാണ് ലീലാമ്മ.