പഞ്ചായത്ത്​ സേവനങ്ങൾ ഇനി വിരൽതുമ്പിൽ

പഞ്ചായത്ത്​ സേവനങ്ങൾ ഇനി വിരൽതുമ്പിൽജില്ലതല പ്രഖ്യാപനം ഇന്ന്​ മന്ത്രി പി.എ. മുഹമ്മദ് റിയാസ് നിർവഹിക്കുംകണ്ണൂർ: ജില്ലയിലെ 25 ഗ്രാമപഞ്ചായത്തുകളിലെ സേവനം ഇനി വിരൽതുമ്പിൽ. രണ്ടാംഘട്ടമായി 12 ഗ്രാമപഞ്ചായത്തുകളില്‍ പൂര്‍ത്തീകരിച്ച ഐ.എൽ.ജി.എം.എസ് സോഫ്റ്റ്​വെയറി​ൻെറ ജില്ലതല പ്രഖ്യാപനം ബുധനാഴ്ച മന്ത്രി പി.എ. മുഹമ്മദ് റിയാസ് നിര്‍വഹിക്കും. പെരളശ്ശേരി ഗ്രാമപഞ്ചായത്ത് കമ്യൂണിറ്റി ഹാളില്‍ വൈകീട്ട് നാലിനാണ് പരിപാടി.പൊതുജനങ്ങള്‍ക്ക് ഗ്രാമപഞ്ചായത്ത് സേവനങ്ങള്‍ എളുപ്പത്തിലും കാര്യക്ഷമമായും ലഭ്യമാക്കുക എന്ന ലക്ഷ്യത്തോടെയാണ് സോഫ്റ്റ്​വെയര്‍ സ്ഥാപിച്ചിട്ടുള്ളത്. പെരളശ്ശേരി, ധര്‍മടം, കോളയാട്, മാലൂര്‍, കേളകം, നാറാത്ത്, കണ്ണപുരം, മുഴപ്പിലങ്ങാട്, മുണ്ടേരി, ഇരിക്കൂര്‍, പേരാവൂര്‍, ചെറുകുന്ന് പഞ്ചായത്തുകളെയാണ് പദ്ധതിയുടെ രണ്ടാംഘട്ടത്തില്‍ ഉള്‍പ്പെടുത്തിയിട്ടുള്ളത്. ആദ്യഘട്ടത്തില്‍ 13 പഞ്ചായത്തുകളിലായിരുന്നു സോഫ്റ്റ്​വെയര്‍ സ്ഥാപിച്ചത്. ഇതോടെ ജില്ലയില്‍ 25 ഗ്രാമപഞ്ചായത്തുകളിലാണ് ഇതുവഴി സേവനം ലഭിക്കുക. ഗ്രാമപഞ്ചായത്തുകളില്‍ ഉപയോഗിക്കുന്ന വിവിധ സോഫ്റ്റ്​വെയറുകള്‍ ഒറ്റ പ്ലാറ്റ്‌ഫോമില്‍ ലഭ്യമാക്കാനും സിറ്റിസണ്‍ ലോഗിന്‍ വഴി അപേക്ഷ ഓണ്‍ലൈനായി സമര്‍പ്പിക്കാനും സാക്ഷ്യപത്രങ്ങള്‍, അനുമതി പത്രങ്ങള്‍ എന്നിവ ഡൗണ്‍ലോഡ് ചെയ്യാനും അപേക്ഷയുടെ തല്‍സ്ഥിതി വിവരം ഓണ്‍ലൈനായി നിരീക്ഷിക്കാനും ഇതുവഴി സാധിക്കും.