മുഖംമിനുക്കാനൊരുങ്ങി വിനോദ കേന്ദ്രങ്ങൾ

മുഖംമിനുക്കാനൊരുങ്ങി വിനോദ കേന്ദ്രങ്ങൾ-പടം -muzhappilangad beech -മുഴപ്പിലങ്ങാട്​ ഡ്രൈവ്​ ഇൻ ബീച്ച്​ മുഴപ്പിലങ്ങാട്​ ഡ്രൈവ്​ ഇൻ ബീച്ചിൽ ലോകോത്തര റിസോര്‍ട്ട് നിര്‍മാണംകണ്ണൂര്‍: മഹാമാരി തീർത്ത പ്രതിസന്ധി മറികടക്കാൻ വിവിധ നവീകരണ ​പദ്ധതികളുമായി ടൂറിസം വകുപ്പ്​. വിനോദ സഞ്ചാര കേന്ദ്രങ്ങളിൽ കൂടുതൽ സൗകര്യമൊരുക്കിയും സൗന്ദര്യവത്​കരണ പ്രവർത്തനങ്ങൾ നടത്തിയും കൂടുതൽ സഞ്ചാരികളെ ആകർഷിക്കാനാണ്​ പദ്ധതി. ഇതിലൂടെ കൂടുതൽ വരുമാനം നേടാനാകുമെന്ന പ്രതീക്ഷയിലാണ്​ ജില്ല ടൂറിസം പ്രമോഷൻ കൗൺസിൽ. ഏറ്റവും വലിയ ഡ്രൈവ് ഇന്‍ ബീച്ചായ മുഴപ്പിലങ്ങാട്ട് വിദേശികളടക്കമുള്ള സഞ്ചാരികളെ ആകര്‍ഷിക്കുന്ന വികസനമാണ് സര്‍ക്കാര്‍ ലക്ഷ്യമിടുന്നത്. മുഴപ്പിലങ്ങാട് -ധര്‍മടം മേഖലയിലെ വികസനത്തിനായി സര്‍ക്കാര്‍ 233.71 കോടിയുടെ ഭരണാനുമതിയാണ്​ നല്‍കിയത്. മുഴപ്പിലങ്ങാടിനും ധര്‍മടത്തിനുമിടയില്‍ നാല് വിഭാഗങ്ങൾ തിരിച്ചാണ് വികസന പ്രവൃത്തി നടത്തുന്നത്. ഇതിലെ ആദ്യ പ്രവൃത്തിക്കായി കിഫ്ബി 52.541 കോടി രൂപ അനുവദിച്ചു. പാത്​വേ ആന്‍ഡ് റീടെയിനിങ് വാള്‍, നടപ്പാത, പുൽതകിടി, മരങ്ങള്‍ ​െവച്ചുപിടിപ്പിക്കല്‍, വൈദ്യുതി വിളക്ക്, ആര്‍ട്ടിസ്​റ്റ്​ പവലിയന്‍, കിയോസ്‌ക്, സ്‌കേറ്റ് പാര്‍ക്ക്, കിഡ്‌സ് പ്ലേ ഉപകരണങ്ങള്‍ തുടങ്ങിയവയാണ് ബീച്ചില്‍ പദ്ധതിയുടെ ഭാഗമായി നിര്‍മിക്കുന്നത്. ഇതുകൂടാതെ ബീച്ചില്‍ 45.60 കോടിയുടെ ലോകോത്തര റിസോര്‍ട്ട് നിര്‍മാണത്തിനും സര്‍ക്കാര്‍ തത്ത്വത്തില്‍ അനുമതി നല്‍കി​. മഹാമാരിയില്‍ ജില്ലയില്‍ രണ്ടുവര്‍ഷമായി ഭൂരിഭാഗം ടൂറിസം കേന്ദ്രങ്ങളും അടഞ്ഞുകിടക്കുകയായിരുന്നു. നിലവില്‍ കോവിഡ് മാനദണ്ഡം പാലിച്ച് ടൂറിസം കേന്ദ്രങ്ങള്‍ പതിയെ തുറക്കുന്നുണ്ടെങ്കിലും വിദേശികളെയും നാട്ടിന്‍പുറങ്ങളിലുള്ളവരെയും ഒരുപോലെ ആകര്‍ഷിക്കുന്ന രീതിയില്‍ ജില്ലയിലെ ടൂറിസം കേന്ദ്രങ്ങളെ മാറ്റാനാണ്​ ടൂറിസം വകുപ്പ് ആലോചിക്കുന്നത്. ഇതിനായി ജില്ലയില്‍ വിവിധ പുതിയ പദ്ധതികള്‍ കൊണ്ടുവരും. നിലവിലുള്ള ടൂറിസം പദ്ധതികളില്‍ കൂടുതല്‍ സജ്ജീകരണങ്ങള്‍ നടത്താനുമാണ്​ തീരുമാനം. കണ്ണൂര്‍ നഗരത്തില്‍നിന്ന്​ മൂന്നുകിലോമീറ്റര്‍ അകലെയുള്ള പുല്ലൂപ്പിക്കടവ് റോഡി​ൻെറ 150 മീറ്റര്‍ ദൂരത്തില്‍ ഇരുവശത്തും നടപ്പാതകളും പൂന്തോട്ടങ്ങളും സജ്ജീകരിക്കും. പദ്ധതി വഴി കടല്‍ബോട്ട്, കയാക്കിങ് തുടങ്ങിയവ പുല്ലൂപ്പിക്കടവില്‍ ആരംഭിക്കാനാണ് ടൂറിസം വകുപ്പി​ൻെറ തീരുമാനം. പൂര്‍ണമായും പരിസ്ഥിതി സൗഹൃദമായാകും പദ്ധതി നടക്കുക. ഇതുമായി ബന്ധപ്പെട്ട പ്രാഥമിക പഠനം പൂര്‍ത്തിയായി. പഴശ്ശി ഡാം പരിസരത്ത്​ ഇക്കോ ടൂറിസം പദ്ധതി ആരംഭിക്കാന്‍ നേരത്തെ തീരുമാനിച്ചിരുന്നു. ഇതു പൂര്‍ത്തിയാവുന്നതോടെ ജലയാത്രയടക്കമുള്ള വിനോദയാത്ര സംവിധാനം നടപ്പാക്കാനാകും. ............................................................................................................പയ്യാമ്പലത്ത്​ സൗന്ദര്യവത്​കരണം കണ്ണൂർ: പയ്യാമ്പലത്ത്​ കൂടുതൽ സൗന്ദര്യവത്​കരണത്തിനുള്ള നടപടികൾ ഡി.ടി.പി.സിയുടെ പരിഗണനയിലുണ്ടെന്ന്​ സെക്രട്ടറി കെ.സി. ശ്രീനിവാസൻ പറഞ്ഞു​. തീരദേശ മേഖലയായ പയ്യാമ്പലത്ത്​ നിർമാണ പ്രവർത്തനങ്ങൾ നടത്തുന്നതിന്​ പരിമിതിയുണ്ട്​. തീരദേശ സംരക്ഷണ നിയമം അനുസരിച്ച്​ സഞ്ചാരികൾക്കായി കൂടുതൽ സൗകര്യം ഒരുക്കും. ടൂറിസം അധികൃതര്‍ പയ്യാമ്പലം സന്ദര്‍ശിച്ച് പ്രാഥമിക പഠനം പൂര്‍ത്തിയാക്കി റിപ്പോര്‍ട്ട് സമര്‍പ്പിച്ചു. പയ്യാമ്പലത്ത് പ്രധാന പ്രവേശന സ്ഥലത്ത് ആകര്‍ഷകമായ കവാടം സ്ഥാപിക്കുക, മികച്ച സെല്‍ഫി പോയൻറ്​​ സ്ഥാപിക്കുക, കുടുംബശ്രീ ശുചീകരിക്കുന്ന മാലിന്യം നീക്കം ചെയ്യാനുള്ള ശാശ്വത പരിഹാരം കാണുക തുടങ്ങിയവയാണ് പ്രധാന മാറ്റങ്ങളെന്നും അദ്ദേഹം പറഞ്ഞു.