വാക്‌സിന്‍ തരുന്നില്ല; കോർപറേഷനോട്​ അവഗണനയെന്ന് മേയര്‍

വാക്‌സിന്‍ തരുന്നില്ല; കോർപറേഷനോട്​ അവഗണനയെന്ന് മേയര്‍കൗൺസിലർമാരുടെ നേതൃത്വത്തിൽ കലക്​ടറേറ്റ്​ മാർച്ച്​ നടത്തി-പടം -giri 01കണ്ണൂര്‍: കണ്ണൂര്‍ കോര്‍പറേഷന് വാക്‌സിന്‍ നല്‍കുന്നതില്‍ സര്‍ക്കാര്‍ അലംഭാവം കാണിക്കുന്നതായും സൗകര്യം ഏര്‍പ്പെടുത്തിയിട്ടും അവഗണന മാത്രമാണ് കാണിച്ചതെന്നും മേയര്‍ അഡ്വ. ടി.ഒ. മോഹനന്‍. വാക്സിന്‍ വിതരണത്തിലെ അവഗണനക്കെതിരെ കോര്‍പറേഷന്‍ കൗണ്‍സിലര്‍മാരുടെ നേതൃത്വത്തില്‍ കലക്ടറേറ്റിന്​ മുന്നില്‍ നടന്ന പ്രതിഷേധ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. രണ്ടുലക്ഷം ജനങ്ങളുള്ള കോര്‍പറേഷന് ഒരുഘട്ടത്തില്‍ ലഭിച്ചത് 150 ഡോസ് വാക്‌സിനാണ്. ഒരു വാര്‍ഡിന് ഒരു ഡോസ് വാക്‌സിന്‍ വരെ നല്‍കേണ്ട ഗതികേടുണ്ടായിട്ടുണ്ട്. കിടപ്പുരോഗികള്‍ക്കും 80 പിന്നിട്ടവര്‍ക്കും വാക്സിന്‍ നല്‍കുന്നതിന്​ സമീപിച്ചപ്പോള്‍ കോര്‍പറേഷന്​ നിഷേധിക്കുകയാണ് ചെയ്തത്. കേരളത്തിലെ മറ്റേത് തദ്ദേശ സ്വയംഭരണ സ്ഥാപനങ്ങളിലേതിനേക്കാളും മികച്ച നിലയില്‍ കോവിഡ് പ്രതിരോധ പ്രവര്‍ത്തനം നടത്തുന്ന കോര്‍പറേഷന്​ ജനമധ്യത്തില്‍ ലഭിക്കുന്ന സ്വീകാര്യതയില്‍ വിറളിപൂണ്ട് സി.പി.എം അനുകൂല നിലപാടുള്ള ചിലരാണ് വാക്സിന്‍ നല്‍കുന്നതിന് തടസ്സമാകുന്നത്. അധികാരികള്‍ നിലപാട് മാറ്റുന്നില്ലെങ്കില്‍ കോര്‍പറേഷനിലെ എല്ലാ ഡിവിഷനുകളിലും സമരം നടത്തുമെന്നും മേയര്‍ പറഞ്ഞു. ഡെപ്യൂട്ടി മേയര്‍ കെ. ഷബീന അധ്യക്ഷത വഹിച്ചു. ഡി.സി.സി പ്രസിഡൻറ്​ സതീശന്‍ പാച്ചേനി, മുസ്‌ലിം ലീഗ് ജില്ല ജനറല്‍ സെക്രട്ടറി അബ്​ദുല്‍ കരീം ചേലേരി, ആരോഗ്യ സ്​ഥിരം സമിതി ചെയര്‍മാന്‍ അഡ്വ. മാര്‍ട്ടിന്‍ ജോര്‍ജ്, സ്ഥിരംസമിതി അധ്യക്ഷന്മാരായ സുരേഷ് ബാബു എളയാവൂര്‍, ഷാഹിന മൊയ്തീന്‍, അഡ്വ. പി. ഇന്ദിര, ഷമീമ ടീച്ചര്‍, സിയാദ് തങ്ങള്‍, മുന്‍ ഡെപ്യൂട്ടി മേയര്‍ സി. സമീര്‍ തുടങ്ങിയവരും യു.ഡി.എഫ് കൗണ്‍സിലര്‍മാരും സമരത്തില്‍ പങ്കെടുത്തു.