ഇത്​ അപകട ജങ്​ഷൻ

ഇത്​ അപകട ജങ്​ഷൻ-പടങ്ങൾ -സന്ദീപ്​കണ്ണൂർ ധനലക്ഷ്​മി ആശുപത്രി ജങ്​ഷനിൽ കാറുകൾഅപകടത്തിൽപെട്ട്​ അഞ്ചുപേർക്ക്​​ പരിക്കേറ്റുകണ്ണൂർ: തിരക്കേറിയതും ഇടുങ്ങിയതുമായ കണ്ണൂർ ധനലക്ഷ്​മി ആശുപത്രി ജങ്​ഷനിൽ അപകടം പതിവാകുന്നു. വ്യാഴാഴ്​ച രാവിലെ നടന്ന അപകടത്തിൽ അഞ്ചുപേർക്കാണ്​ പരിക്കേറ്റത്​. രാവിലെ 6.45 ഓടെയായിരുന്നു അപകടം. തളിപ്പറമ്പ് ഏഴാംമൈല്‍ സ്വദേശികള്‍ സഞ്ചരിച്ച കാര്‍ കക്കാട് ഭാഗത്തുനിന്ന് വരുന്ന മറ്റൊരു കാറുമായി കൂട്ടിയിടിക്കുകയായിരുന്നു. ഈ കാര്‍ സമീപത്ത് നിര്‍ത്തിയിട്ടിരുന്ന ഓട്ടോയുമായും കൂട്ടിയിടിച്ചു. രണ്ട്​ കാറുകളിലായി ഉണ്ടായിരുന്ന ഏഴാംമൈല്‍ സ്വദേശികളായ ഇബ്രാഹിംകുട്ടി, നഫീസ, മുഹമ്മദലി, മനോജ്​, ഓട്ടോ ഡ്രൈവര്‍ രമേശൻ എന്നിവർക്കാണ്​ പരിക്കേറ്റത്​. ആരുടേയും പരിക്ക് ഗുരുതരമല്ല. പരിക്കേറ്റവരെ ധനലക്ഷമി ആശുപത്രിയില്‍ പ്രവേശിപ്പിച്ചു. സ്വകാര്യ ആ​ശുപത്രി, വിദേശ മദ്യശാല, ഓ​ട്ടോ സ്​റ്റാൻഡ്​​ എന്നിവയെല്ലാം സ്​ഥിതി ചെയ്യുന്ന ഇവിടെ വൻ തിരക്കാണ്​ എപ്പോഴും​. കൂടാതെ ഇടുങ്ങിയ റോഡിൽ കൂടുതൽ വാഹനങ്ങൾ എത്തുന്നത്​ ഗതാഗതക്കുരുക്കിനും അപകടത്തിന​ും കാരണമാകുന്നു. റോഡരികിൽ തെരുവ്​ കച്ചവടവും മീൻ, പച്ചക്കറി മാർക്കറ്റുകളും പ്രവർത്തിക്കുന്നുണ്ട്​. യാ​ത്രക്കാർ വാഹനങ്ങൾ റോഡരികിൽ നിർത്തിയിട്ട്​ ഇവിടെ നിന്ന്​ സാധനങ്ങൾ വാങ്ങുന്നത്​ പതിവ്​ കാഴ്​ചയാണ്​. ഇത്​ മിക്കപ്പോഴും ഗതാഗതക്കുരുക്കിന്​ ഇടയാക്കുകയാണ്​. ---------------------------------------------------------------- സ്​പീഡ് ബ്രേക്കർ സ്ഥാപിക്കണംകണ്ണൂർ: ധനലക്ഷ്​മി ആശുപ​്രതി ജങ്​ഷനിൽ ആവർത്തിക്കുന്ന അപകടങ്ങൾ കുറക്കാൻ അടിയന്തരമായി സ്പീഡ് ബ്രേക്കർ സ്ഥാപിക്കണമെന്ന ആവശ്യത്തിന്​ ഏറെ പഴക്കമുണ്ട്​. തിരക്കേറിയ ജങ്​ഷനായതിനാൽ ഗതാഗത നിയന്ത്രണത്തിന്​ ഒരു പൊലീസുകാരനെയെങ്കിലും നിയമിക്കണമെന്ന്​ ജില്ല റെസിഡൻറ്​സ്​ അസോസിയേഷൻ ഭാരവാഹികൾ നിരവധി തവണ അധികൃതരോട്​ ആവശ്യപ്പെട്ടിരുന്നു​. നഗരത്തിലുള്ളവർ പ്രഭാത സവാരിക്കടക്കം ഉപയോഗിക്കുന്ന റോഡാണിത്​. അതിനാൽ ജങ്​ഷനിൽ ആവശ്യമായ സുരക്ഷ ക്രമീകരണങ്ങൾ ഏർപ്പെടുത്തണമെന്ന് വിവിധ സംഘടനകളും നിരവധി തവണ ആവശ്യപ്പെട്ടിട്ടുണ്ട്​​. വ്യാഴാഴ്​ചത്തെ അപകടത്തിൽ അഞ്ചുപേർക്ക്​ പരിക്കേറ്റ സാഹചര്യത്തിൽ ഇനിയെങ്കിലും സ്​പീഡ് ബ്രേക്കർ സ്ഥാപിക്കാൻ അധികൃതർ നടപടി സ്വീകരിക്കണമെന്ന്​ ജില്ല റെസിഡൻറ്​സ്​ അസോസിയേഷൻ ട്രഷറർ മുജീബ് പുതിയ വീട്ടിൽ ആവശ്യപ്പെട്ടു. ​