കണ്ണൂർ വിമാനത്താവളം: പറന്നുയർന്ന്​ സ്വർണം; കൂട്ടിന്​ കസ്​റ്റംസും

​കണ്ണൂർ വിമാനത്താവളം: പറന്നുയർന്ന്​ സ്വർണം; കൂട്ടിന്​ കസ്​റ്റംസും-സ്വർണക്കടത്തുമായി ബന്ധപ്പെട്ട്​ ജോലിനഷ്​ടമായത്​ മൂന്നു കസ്​റ്റംസ്​ ഉദ്യോഗസ്ഥർക്ക്​ കണ്ണൂർ: സ്വർണക്കടത്ത്​ കേസുമായി ബന്ധപ്പെട്ട്​ കഴിഞ്ഞ ദിവസം കണ്ണൂർ വിമാനത്താവളത്തിലെ മൂന്ന്​ കസ്​റ്റംസ്​ ഉദ്യോഗസ്​ഥർക്കാണ്​ ജോലി നഷ്​ടമായത്​. ഇത്തരം കേസുകളുമായി ബന്ധപ്പെട്ട്​ അപൂർവങ്ങളിൽ അപൂർവമായാണ്​ കസ്​റ്റംസ്​ ഉദ്യോഗസ്​ഥർക്കെതിരെ നടപടി സ്വീകരിക്കുക. അതും വ്യക്​തമായ തെളിവുകളുടെ അടിസ്​ഥാനത്തിൽ മാത്രം. കരിപ്പൂർ സ്വർണക്കടത്ത്​ കേസിൽ അറസ്​റ്റിലായ അർജുൻ ആയങ്കിയുടെ മൊഴിയുടെ അടിസ്​ഥാനത്തിൽ കണ്ണൂർ വിമാനത്താവളം കേന്ദ്രീകരിച്ച്​ നടന്ന സ്വർണക്കടത്തുമായി ബന്ധപ്പെട്ട്​ കൂടുതൽ അന്വേഷണങ്ങളാണ്​ ഡയറക്​​ടറേറ്റ്​ ഓഫ്​ റവന്യൂ ഇൻറലിജൻസും കസ്​റ്റംസും നടത്തുന്നത്​. 2019 ആഗസ്​റ്റ്​ 19ന് കണ്ണൂർ വിമാനത്താവളത്തിൽ നാലര കിലോഗ്രാം സ്വർണവുമായി മൂന്നുപേർ റവന്യൂ ഇൻറലിജൻസി​ൻെറ പിടിയിലായ കേസ് അടിസ്ഥാനമാക്കിയാണ്​ മൂന്ന്​ കസ്​റ്റംസ്​ ഉദ്യോഗസ്​ഥർക്കെതിരെ നടപടിയുണ്ടായത്​. കണ്ണൂരിൽ മുമ്പ്​ നടന്ന സ്വർണക്കടത്തിനും​ കൂടുതൽ ഉദ്യോഗസ്​ഥരുടെ സഹായം ലഭിച്ചിരുന്നുവെന്ന കാര്യവും ഡി.ആർ.ഐയുടെ അന്വേഷണപരിധിയിലാണ്​. സ്വർണക്കടത്ത് കേസിലെ പ്രതികളുടെ മൊബൈൽ ഫോണിലേക്ക് സ്ഥിരമായും തിരിച്ചും ബന്ധപ്പെടുന്നവരുടെ വിവരങ്ങൾ ഡി.ആർ.ഐ ശേഖരിച്ചിരുന്നു. ഇതിനായി സൈബർ സെല്ലി​ൻെറ സഹായവും തേടി. ഇങ്ങനെയാണ്​ കേസിൽ കസ്​റ്റംസ് ഉദ്യോഗസ്​രുടെ പങ്കിനെ സംബന്ധിച്ച്​​ വ്യക്​തമായ സൂചന ലഭിക്കുന്നത്​. ഉദ്യോഗസ്ഥർ നടത്തിയ വിദേശയാത്രയെ കുറിച്ചും അന്വേഷിച്ചിരുന്നു.സ്വർണവുമായി എത്തുന്ന യാത്രക്കാരെ എക്​സ്​റെ, മെറ്റൽ ഡിറ്റക്​ടർ പരിശോധന കൂടാതെ കടത്തിവിടുകയാണ് പതിവ്. ഡി.ആർ.ഐ പരിശോധനയിൽ കള്ളക്കളി പുറത്താകുകയായിരുന്നു. വിമാനത്താവളം വഴി സ്വർണം കടത്തിയ കേസിൽ തെളിവുകൾക്കായി ഫോറൻസിക് പരിശോധനയും നടത്തിയിരുന്നു. ജയിലിൽ കഴിയുന്ന ടി.പി വധക്കേസ്​ പ്രതികളടക്കം കണ്ണൂർ വിമാനത്താവളം വഴിയുള്ള സ്വർണക്കടത്ത്​ നിയന്ത്രിക്കുന്നുവെന്ന കൂടുതൽ തെളിവുകള​ും പുറത്തുവന്നുകൊണ്ടിരിക്കുകയാണ്​. എന്നാൽ, സ്വർണക്കടത്ത് വാർത്തകൾ​ ദേശീയശ്രദ്ധ പിടിച്ചുപറ്റുമ്പോഴും കണ്ണൂർ വിമാനത്താവളം കേന്ദ്രീകരിച്ചുള്ള കടത്ത് അയവില്ലാതെ തുടരുകയാണ്​. കഴിഞ്ഞ കുറച്ചു ദിവസങ്ങളായി തുടർച്ചയായി ഇവിടെ സ്വർണക്കടത്ത് ആവർത്തിക്കുകയാണ്. ഉദ്​ഘാടനം കഴിഞ്ഞ്​ രണ്ടര വർഷത്തിനിടെ 125 കിലോയിലധികം സ്വർണമാണ്​ കണ്ണൂർ വിമാനത്താവളം വഴി കടത്തുന്നതിനിടെ പിടികൂടിയത്​. ഉദ്ഘാടനം ചെയ്​ത്​ 17ാം ദിവസമായ 2018 ഡിസംബര്‍ 25ന്​ ആദ്യമായി പിടികൂടിയത് രണ്ട്​ കിലോ സ്വര്‍ണമായിരുന്നു. കേസിൽ പിണറായി സ്വദേശിയെയായിരുന്നു അന്ന്​ കസ്​റ്റംസ്​ പിടികൂടിയത്​. കോവിഡ് പ്രതിരോധ വേളയിലും കണ്ണൂർ വഴിയുള്ള സ്വർണക്കടത്തിന്​ ഒരു കുറവുമില്ലായിരുന്നു. ഈ വര്‍ഷം ഇതുവരെയായി 50നടുത്ത്​ ചെറുതും വലുതുമായ സ്വർണവേട്ടയാണ്​ കണ്ണൂർ വിമാനത്താവളത്തിൽ നടന്നത്​. കണ്ണൂരിലെ സ്വര്‍ണക്കടത്ത് ഏറെയും മലദ്വാരത്തിലൂടെയാണ് എന്നതാണ്​ പ്രത്യേകത. പ്രത്യേക ഉറയില്‍ പേസ്​റ്റ്​ രൂപത്തിലാക്കിയാണ് ഏറെയും കടത്ത്. മൂന്ന്​ അടിവസ്ത്രം ധരിച്ച് അതില്‍ രണ്ടെണ്ണത്തില്‍ സ്വര്‍ണം പേസ്​റ്റ്​ രൂപത്തിലാക്കി തേച്ചുപിടിപ്പിച്ചുകടത്തിയ ചരിത്രവും കണ്ണൂരിനുമാത്രം. സ്വര്‍ണക്കടത്തിന് ഒരു സ്ത്രീ പിടിയിലായതും ഇവിടെ തന്നെ. വിമാനത്തി​ൻെറ ശുചിമുറിയിലെ മാലിന്യത്തില്‍ നാഥനില്ലാതെ സ്വര്‍ണം കണ്ടെത്തിയ സംഭവം അടുത്തിടെയാണ് നടന്നത്​​......................................................................ശിക്ഷ 'ചെറുത്'​; കടത്തിലേറെയും യുവാക്കൾകണ്ണൂർ: നിയമത്തിലെ പഴുതും കടുത്ത ശിക്ഷയില്ലാത്തതുമാണ്​ സ്വർണക്കടത്ത്​ കൂടാൻ കാരണമായി കസ്​റ്റംസ്​ ഉദ്യോഗഗസ്​ഥർ വിലയിരുത്തുന്നത്​. ഇതുകൊണ്ടുതന്നെ കൂടുതലും യുവാക്കളാണ്​ ഇത്തരം കുറ്റകൃത്യങ്ങളിലേർപ്പെടുന്നത്​. ഒരുകോടിക്ക്​ മുകളിലുള്ള സ്വർണം പിടികൂടിയാൽ മാത്രമേ അറസ്​റ്റ്​ നടപടി കൈക്കൊള്ളുന്നുള്ളൂ. അതിന്​ താഴെയുള്ള കടത്തിൽ നികുതിയടച്ച്​ സ്വയം ജാമ്യത്തിൽ പ്രതിക്ക്​ പുറത്തിറങ്ങാം എന്നതാണ്​ നിയമം. അതിനാൽതന്നെ സ്വർണക്കടത്തിൽ പിടികൂടുന്ന 'കാരിയർ'മാറിൽ മിക്കവാറും യുവാക്കളായിരിക്കും. കേസിൽ കുടുങ്ങിയാലും ശിക്ഷ കിട്ടില്ല എന്ന ഉറപ്പും പിടിക്കപ്പെട്ടില്ലെങ്കിൽ ലഭിക്കുന്ന കമീഷൻ തുകയുമാണ്​ യുവാക്കളെ കടത്തിന്​ കൂടുതൽ പ്രേരിപ്പിക്കുന്നത്​.