മിം​സിൽ അത്യാധുനിക ചികിത്സയിലൂടെ വയോധികന്​ രോഗമുക്​തി

മിം​സിൽ അത്യാധുനിക ചികിത്സയിലൂടെ വയോധികന്​ രോഗമുക്​തി കണ്ണൂർ: കണ്ണൂർ ആസ്​റ്റർ മിംസിൽ അത്യാധുനിക ചികിത്സയിലൂടെ 65 വയസ്സുകാരന് രോഗമുക്​തി.ഫെവാർ (Fenestrated endovasular Aortic Repair) എന്ന ഉത്തര കേരളത്തിൽ ആദ്യമായതും അപൂർവവുമായ ചികിത്സയാണ്​ 65കാരന് നടത്തിയത്​. വയറുവേദനയെ തുടർന്ന് അതിഗുരുതരാവസ്ഥയിലായിരുന്ന രോഗിയെയാണ്​ ചികിത്സയിലുടെ സുഖപ്പെടുത്തിയത്​​. വയറ്റിലെ അമിത രക്​തസ്രാവമായിരുന്നു വേദനക്ക്​ കാരണം. അടിയന്തരമായി മഹാധമനിയിലെ രക്​ത ചോർച്ച അടക്കുക മാത്രമായിരുന്നു ജീവൻ രക്ഷിക്കാനുള്ള ഏക പോംവഴി. ചോർച്ച സംഭവിച്ച ഭാഗത്തിന് തൊട്ടുമുകളിലായി മറ്റ് അവയവങ്ങളിലേക്കുള്ള മഹാധമനിയുടെ ശാഖകൾ ആരംഭിക്കുന്നുണ്ട്. ഈ സാഹചര്യത്തിലാണ് ഫെവാർ ചികിത്സയിലൂടെ രോഗം ഭേദമാക്കിയതെന്ന്​ ഡോക്​ടർമാർ വാർത്തസമ്മേളനത്തിൽ അറിയിച്ചു. വൃക്ക ഉൾപ്പെടെയുള്ള മറ്റ് അവയവങ്ങളിലേക്ക് രക്തം ഒഴുകുന്ന ഭാഗങ്ങളിൽ സുഷിരം സൃഷ്​ടിച്ച ശേഷം രക്​ത ചോർച്ച തടഞ്ഞ്​ അത് കൃത്യമായി സ്ഥാപിക്കുകയാണ് ചെയ്​തത്. എട്ട്​ മണിക്കൂർ ദൈർഘ്യമുള്ള ശസ്ത്രക്രിയ പൂർത്തീകരിച്ച് അഞ്ചാം ദിവസം രോഗിയെ ഡിസ്​ചാർജ് ചെയ്തു. വാർത്തസമ്മേളനത്തിൽ ഡോക്​ടർമാരായ അനിൽകുമാർ, പ്ലാസിഡ് സെബാസ്​റ്റ്യൻ, സി.വി. ഉമേശൻ, എ. വിനു, പ്രസാദ് സുരേന്ദ്രൻ, എം. ഗണേഷ് എന്നിവർ പങ്കെടുത്തു.