ഓൺലൈൻ പഠനം: കുട്ടികൾക്ക് താങ്ങാവാൻ ധർമടം പഞ്ചായത്ത്

ഓൺലൈൻ പഠനം: കുട്ടികൾക്ക് താങ്ങാവാൻ ധർമടം പഞ്ചായത്ത് തലശ്ശേരി: ഓൺലൈൻ പഠനത്തിന് സംവിധാനമില്ലാതെ പ്രയാസപ്പെടുന്ന കുട്ടികൾക്ക് താങ്ങാവാൻ ധർമടം ഗ്രാമപഞ്ചായത്ത് ജനകീയ ഇടപെടലിലൂടെ മാതൃകാപദ്ധതി തയാറാക്കുന്നു. ഇതിനായി പഞ്ചായത്തിലെ 18 വാർഡുകളിലും അതത് മെംബർമാരുടെ നേതൃത്വത്തിൽ പ്രത്യേക വാർഡ്​തല വികസനസമിതികൾ രൂപവത്കരിക്കും. വാർഡിലെ താമസക്കാരായ കുട്ടികളിൽ ആർക്കൊക്കെ ഓൺലൈൻ പഠനസാമഗ്രികൾ ഇല്ലെന്ന് ബന്ധപ്പെട്ട അധ്യാപകരിൽനിന്ന്​ കണ്ടെത്തി അവർക്ക് മൊബൈൽ ഫോണുകൾ എത്തിച്ചുനൽകാനാണ് തീരുമാനം.ഇതിനാവശ്യമായ സാമ്പത്തികകാര്യങ്ങൾ ജനങ്ങളിൽനിന്ന് സ്വരൂപിക്കും. തലശ്ശേരി സൗത്ത് ബി.ആർ.സിയിൽ ഉൾപ്പെടുന്ന ന്യൂ മാഹി, ധർമടം, എരഞ്ഞോളി ഗ്രാമപഞ്ചായത്തുകളിലെ പ്രസിഡൻറുമാർ, തലശ്ശേരി നഗരസഭ ചെയർപേഴ്സൻ, അധ്യാപക പ്രതിനിധികൾ എന്നിവർ ഒത്തുചേർന്ന ഓൺലൈൻ യോഗത്തിലാണ് ഇതുസംബന്ധിച്ച തീരുമാനമുണ്ടായത്.