മലയോര ഹൈവേ നാളെ മുഖ്യമന്ത്രി ഉദ്ഘാടനം ചെയ്യും

പയ്യന്നൂർ: ജില്ലയിൽ നിർമാണം പൂർത്തിയായ ആദ്യത്തെ മലയോര ഹൈവേ ബുധനാഴ്​ച മുഖ്യമന്ത്രി പിണറായി വിജയൻ ഉദ്ഘാടനം ചെയ്യുമെന്ന് സി. കൃഷ്ണൻ എം.എൽ.എ വാർത്തസമ്മേളനത്തിൽ പറഞ്ഞു. വൈകിട്ട് 4.30ന് ചെറുപുഴയിൽ നടക്കുന്ന ഉദ്ഘാടന യോഗത്തിൽ മന്ത്രി ജി.സുധാകരൻ അധ്യക്ഷത വഹിക്കും. 400 കോടി രൂപ കിഫ്ബി ഫണ്ട് ഉപയോഗിച്ച് ചെറുപുഴ മുതൽ ഇരിട്ടി വള്ളിത്തോടുവരെ 110 കിലോമീറ്റർ ദൈർഘ്യത്തിലും 12 മീറ്റർ വീതിയിലുമാണ് മലയോര ഹൈവേ നിർമിച്ചിട്ടുള്ളത്. മെക്കാഡം ടാറിങ്ങും പൂർത്തിയാക്കിയിട്ടുണ്ട്. റോഡ് വീതികൂട്ടി നിർമിക്കുന്നതിന് ആവശ്യമായ സ്ഥലങ്ങൾ മുഴുവൻ ജനങ്ങൾ സൗജന്യമായി നൽകിയതാണ്.