തടയണ നിർമിച്ച്​ വിദ്യാർഥികൾ

പാനൂർ: മൊകേരി രാജീവ് ഗാന്ധി മെമ്മോറിയൽ ഹയർ സെക്കൻഡറി സ്കൂൾ എൻ.എസ്.എസ് വിദ്യാർഥികൾ ചെറുവാഞ്ചേരി പൂവത്തൂർ പുഴയിൽ രണ്ട് തടയണകൾ നിർമിച്ചു. കാർഷിക മേഖലയായ പ്രദേശത്ത് കൃഷി ചെയ്യുന്നതിൽ മുഖ്യ ജലസ്രോതസ്സാണ് പൂവത്തൂർ പുഴ. വേനൽ എത്തിയതോടെ നീരൊഴുക്ക് ഗണ്യമായി കുറഞ്ഞ്​ കൃഷി പ്രതിസന്ധിയിലായി. ഇതിന് പരിഹാരമായാണ് തടയണ കെട്ടിയത്. പുഴയിൽ ഒരു കിലോമീറ്റർ വിട്ട് രണ്ട് തടയണകൾ കെട്ടിയത് കൃഷിക്കാർക്ക് ആശ്വാസമാകും. പരിസരങ്ങളിലെ കിണറുകളിലും ജലനിരപ്പുയരും. മുപ്പത് വളൻറിയർമാർ രണ്ട് ടീമുകളായാണ് പ്രവൃത്തി പൂർത്തീകരിച്ചത്. നാട്ടുകാരും സഹായിക്കാനെത്തി. വാർഡ് മെംബർ ഹൈമ കോട്ടായി ഉദ്ഘാടനം ചെയ്തു. കെ.കെ. അനന്തൻ അധ്യക്ഷത വഹിച്ചു. പ്രോഗ്രാം ഓഫിസർ സജീവ് ഒതയോത്ത്, വാർഡ് മെംബർ എൻ. റീന വളൻറിയർമാരായ കീർത്തന പ്രകാശ്, റതുൽ, സൂര്യകിരൺ, ധീരജ്, നയന കോട്ടായി എന്നിവർ നേതൃത്വം നൽകി.