ജില്ല പഞ്ചായത്ത് തില്ലങ്കേരി ഡിവിഷൻ തെരഞ്ഞെടുപ്പ്: പരസ്യ പ്രചാരണത്തിന് സമാപനം

ഇരിട്ടി: ജില്ല പഞ്ചായത്ത് തില്ലങ്കേരി ഡിവിഷനിൽ വ്യാഴാഴ്ച നടക്കുന്ന തെരഞ്ഞെടുപ്പിനുള്ള പരസ്യ പ്രചാരണത്തിന് തിരശ്ശീല വീണു. ഇരുമുന്നണികളും ബി.ജെ.പിയും പ്രചാരണ രംഗത്ത് കാണിച്ച വീറും വാശിയും കൊട്ടിക്കലാശത്തിലും അലതല്ലി. കോവിഡ് നിയന്ത്രണങ്ങൾ പാലിച്ചുകൊണ്ട് നടന്ന പരസ്യ പ്രചരണത്തി​ൻെറ സമാപനത്തിന് മൂന്ന് മുന്നണികളും വ്യത്യസ്ത മേഖലകളാണ് തിരഞ്ഞടുത്തത്​.

21ന് നടക്കുന്ന പോളിങ്ങിനുള്ള ഒരുക്കങ്ങൾ ജില്ല ഭരണകൂടവും പൂർത്തിയാക്കി. സ്വതന്ത്രരടക്കം ഏഴ് സ്ഥാനാർഥികളാണ് മത്സരരംഗത്തുള്ളത്.

യു.ഡി.എഫ് സ്ഥാനാർഥി ലിൻഡ ജെയിംസി​‍ൻെറ പ്രചാരണ സമാപനം ആറളം ഫാമിലായിരുന്നു. സ്ഥാനാർഥിക്ക് പുറമെ യു.ഡി.എഫി​‍ൻെറ സംസ്ഥാന -ജില്ല നേതാക്കളും പ്രദേശിക നേതാക്കളും പ്രവർത്തകരും പങ്കെടുത്തു. കേരള കോൺഗ്രസ് ചെയർമാൻ പി.ജെ. ജോസഫ്, മുൻ എം.പി ഫ്രാൻസിസ് ജോർജ്, മറ്റ് നേതാക്കളായ തോമസ് വക്കത്താനം, കെ.എ. ഫിലിപ്പ്, റോജസ് ​െസബാസ്​റ്റ്യൻ, കെ. വേലായുധൻ, തോമസ് വർഗീസ്, ഇബ്രാഹിം മുണ്ടേരി, അൻസാരി തില്ലങ്കേരി, റഹിയാനത്ത് സുബി എന്നിവർ സംസാരിച്ചു.

എൽ.ഡി.എഫ് സ്ഥാനാർഥി ബിനോയി കുര്യ​ൻെറ പ്രചാരണ സമാപനം എടൂരിലായിരുന്നു. നിരവധി പ്രവർത്തകർ പങ്കെടുത്തു. സി.പി.എം ജില്ല സെക്ര​േട്ടറിയറ്റ് അംഗം പനോളി വത്സൻ ഉദ്ഘാടനം ചെയ്തു. ബിനോയി കുര്യൻ, കെ.വി. സക്കീർ ഹുസൈൻ, വിപിൻ തോമസ്, ജെയിസൻ ജീരകശേരി, ഇ.പി. രമേശൻ, കെ.ജെ. ജോസഫ്, അനൂപ് ചന്ദ്രൻ എന്നിവർ സംസാരിച്ചു.

ബി.ജെ.പി സ്ഥാനാർഥി കൂട്ട ജയപ്രകാശി​‍ൻെറ പ്രചാരണ സമാപനം കാക്കയങ്ങാട് ടൗണിൽ ആയിരുന്നു. ബി.ജെ.പി സംസ്​ഥാന ഉപാധ്യക്ഷൻ സി. സദാനന്ദൻ മാസ്​റ്റർ ഉദ്‌ഘാടനം ചെയ്തു. മണ്ഡലം പ്രസിഡൻറ്​ എം.ആർ. സുരേഷ് അധ്യക്ഷത വഹിച്ചു. ജില്ല പ്രസിഡൻറ്​ എൻ. ഹരിദാസ്, ഉത്തരമേഖല ഉപാധ്യക്ഷൻ വി.വി. ചന്ദ്രൻ, എൻ.വി. ഗിരീഷ് എന്നിവർ സംസാരിച്ചു.

49214 വോട്ടർമാർ നാളെ ബൂത്തിലേക്ക് തില്ലങ്കേരി ഡിവിഷനിൽ 49214 വോട്ടർമാർ വ്യാഴാഴ്​ച ഏഴ് സ്ഥാനാർഥികളുടെ ജയ- പരാജയങ്ങൾ നിർണയിക്കും. ഇതിൽ 23308 പേർ പുരുഷ വോട്ടറും 25906 സ്ത്രീ വോട്ടറുമാണ്. ഡിവിഷൻ പരിധിയിൽ വരുന്ന 42 വാർഡുകൾക്കായി 64 ബൂത്തുകൾ സജ്ജമാക്കി. 350ഒാളം പോളിങ് ജീവനക്കാർക്കുള്ള പരിശീലന ക്ലാസുകളും നൽകി. പോളിങ്​ സാമഗ്രികളുടെ വിതരണം ബുധനാഴ്ച രാവിലെ ഇരിട്ടി ബ്ലോക്ക് ഓഫിസിൽ നടക്കും. ഇലക്ടോണിക്‌​ വോട്ടുയന്ത്രങ്ങൾ ബ്ലോക്ക് ഓഫിസിൽ എത്തിച്ചു കഴിഞ്ഞു. വ്യാഴാഴ്ച രാവിലെ ഏഴു മുതൽ വൈകീട്ട് ആറുവരെയാണ് പോളിങ്​ സമയം. കോവിഡ് രോഗികൾ വൈകീട്ട് അഞ്ചിനും ആറിനും ഇടയിൽ റിപ്പോർട്ട് ചെയ്യണം. ആറിന്​ പോളിങ് അവസാനിക്കുന്ന മുറക്ക്​ കോവിഡ് രോഗികൾക്ക് വോട്ടു ചെയ്യാനുള്ള അവസരം ഒരുക്കും. ഇലക്ടോണിക്‌ വോട്ടുയന്ത്രത്തിലെ വോട്ടുകൾ വെള്ളിയാഴ്ച ബ്ലോക്ക് ഓഫിസിൽ വെച്ചും പോസ്​റ്റൽ വോട്ടുകളും കോവിഡ് പോസ്​റ്റൽ വോട്ടുകളും കലക്ടറേറ്റിൽ നിന്നുമാണ് എണ്ണുക. ഉച്ചയോടെ ഫലമറിയാൻ കഴിയും.