തായാട്ടി​െൻറ ഓർമക്ക്​ ഒമ്പതാണ്ട്​

തായാട്ടി​ൻെറ ഓർമക്ക്​ ഒമ്പതാണ്ട്​ പാനൂർ: കുട്ടികളുടെ മുത്തച്ഛൻ എന്നറിയപ്പെട്ട പാനൂരി​ൻെറ സ്വന്തം കുഞ്ഞനന്തൻ തായാട്ട് ഓർമയായിട്ട് ഇന്നേക്ക് ഒമ്പത് വർഷം. കുട്ടികളുടെ മനമറിഞ്ഞ അധ്യാപകൻ, എഴുത്തുകാരൻ, നാടക രചയിതാവ് എന്നീ നിലകളിൽ ശോഭിച്ചയാളായിരുന്നു കെ. തായാട്ട്. ഇന്ത്യൻ സമര ചരിത്രം ലളിതമായി പറഞ്ഞുകൊടുക്കുന്ന അപൂർവ പുസ്തകങ്ങളിലൊന്നാണ് അദ്ദേഹത്തി​ൻെറ 'നാം ചങ്ങല പൊട്ടിച്ച കഥ'. പല ജോലികളും ചെയ്ത തായാട്ട് അധ്യാപനമാണ് ത​ൻെറ വഴിയെന്ന് തിരിച്ചറിഞ്ഞതാണ് വഴിത്തിരിവായത്. മികച്ച അധ്യാപകനുള്ള സംസ്ഥാന - ദേശീയ പുരസ്കാര ജേതാവും മലയാള സാഹിത്യത്തിലെ സമസ്ത മേഖലകളിലും കഴിവ് തെളിയിച്ച സാഹിത്യകാരനുമാണ്. 1951ൽ പ്രസിദ്ധീകരിച്ച 'പുത്തൻ കനി' ആദ്യ കഥാസമാഹാരവും 1953ൽ പ്രസിദ്ധീകരിച്ച 'പാൽ പതകൾ' ആദ്യ കവിത സമാഹാരവുമാണ്. നൂറോളം റേഡിയോ നാടകങ്ങൾ തായാട്ടി​േൻറതായുണ്ട്. ബാലസാഹിത്യ മേഖലയിൽ മാത്രം 20 പുസ്തകങ്ങൾ കെ. തായാട്ട് എഴുതി. ജനുവരി 30, മന്ദര, അക്ഷരം, ത്യാഗസീമ, ഒരു കുട്ടിയുടെ ആത്മകഥ തുടങ്ങിയവയാണ് ശ്രദ്ധേയ കൃതികൾ. ബാലസാഹിത്യത്തിനുള്ള സമഗ്ര സംഭാവനക്ക്​ ബാലസാഹിത്യ ഇൻസ്​റ്റിറ്റ്യൂട്ട് അവാർഡ്, സമസ്ത കേരള സാഹിത്യ പരിഷത്ത് അവാർഡ്, കേരള സംഗീത നാടക അക്കാദമി പുരസ്കാരം, അബൂദബി ശക്​തി അവാർഡ്, ചെറുകാട് സ്മാരക ശക്​തി അവാർഡ് എന്നിവ ഉൾപ്പെടെ നിരവധി പുരസ്കാരങ്ങൾ നേടിയിട്ടുണ്ട്. തായാട്ട് മാഷി​ൻെറ ഓർമ പുതുക്കാൻ ഇന്ന് രാവിലെ എട്ടിന്​ സ്മൃതി മണ്ഡപത്തിൽ പുഷ്പാർച്ചന നടക്കും.