തൊഴിലുറപ്പ് പദ്ധതി ഓംബുഡ്‌സ്മാൻ സന്ദർശിച്ചു

കണ്ണൂർ: ദേശീയ ഗ്രാമീണ തൊഴിലുറപ്പ് പദ്ധതിയിൽ അഴീക്കോട് പഞ്ചായത്തിലെ കയർ ഭൂവസ്ത്രം ഉപയോഗിച്ച് നിർമിക്കുന്ന നടപ്പാതയുടെ പ്രവൃത്തി ഓംബുഡ്‌സ്മാൻ കെ.എം. രാമകൃഷ്ണൻ സന്ദർശിച്ചു. പദ്ധതിയെക്കുറിച്ച് ഓംബുഡ്‌സ്മാൻ തൊഴിലാളികളുമായി സംസാരിച്ചു. തൊഴിലുറപ്പ് സൈറ്റിൽ തൊഴിലാളികൾക്ക് അടിസ്ഥാന സൗകര്യം ഒരുക്കിക്കൊടുക്കണമെന്നും പദ്ധതിയുമായി ബന്ധപ്പെട്ട പരാതികൾ ഉണ്ടെങ്കിൽ തൊഴിലാളികൾക്കും പൊതുജനങ്ങൾക്കും നേരിട്ടോ ഫോൺ മുഖാന്തരമോ, ഇ-മെയിലായോ തപാലിലോ സമർപ്പിക്കാമെന്നും അറിയിച്ചു. പ്രവൃത്തിയുടെ ഗുണനിലവാരവും തൊഴിലാളികളുടെ ക്ഷേമവും ഉറപ്പുവരുത്തണമെന്നും ആക്ഷേപങ്ങളോ പരാതികളോ ഉണ്ടെങ്കിൽ ഓംബുഡ്മാൻ നേരിട്ട് ജനങ്ങളിൽനിന്ന് കേൾക്കാനും പരിഹരിക്കാനും പഞ്ചായത്തുകളിലും ബ്ലോക്കുകളിലും സൗകര്യം ഒരുക്കുമെന്നും അറിയിച്ചു.