തോക്കുമായി വനത്തിൽ​ പോയ അഞ്ചംഗ സംഘത്തിലെ രണ്ടുപേർക്ക് വെടിയേറ്റു

തൊടുപുഴ: നാടൻ തോക്കുമായി വനത്തി​ൽ​ പോയ അഞ്ചംഗ സംഘത്തിലെ രണ്ടുപേർക്ക് ദുരൂഹ സാഹചര്യത്തിൽ വെടിയേറ്റു. ഉടുമ്പന്നൂർ മലയിഞ്ചി വെണ്ണിയാനി സ്വദേശികളായ തടിവെണ്ണിയാനി വീട്ടിൽ ടി.കെ. മനോജ് (30), പാച്ചുപതിക്കൽ സി.ബി. മുകേഷ് (32) എന്നിവർക്കാണ് പരിക്ക്​. ഇവർക്ക്​ ഒപ്പമുണ്ടായിരുന്ന മൂന്നുപേരെ കരിമണ്ണൂർ പൊലീസ് അറസ്​റ്റ്​ ചെയ്തു. ബുധനാഴ്ച പുലർച്ച നാ​േലാടെ മലയിഞ്ചി വനത്തിലാണ് സംഭവം.

സുഹൃത്തുക്കളും ബന്ധുക്കളുമടങ്ങുന്ന സംഘം നാലുദിവസം മുമ്പാണ്​ കാട്ടിലേക്ക് പോയത്​. ​വെടിവെച്ച്​ മീൻ പിടിക്കുകയായിരുന്നു ലക്ഷ്യമെന്ന്​ പറയുന്നു. മടങ്ങും വഴി തോക്കുമായി നടന്നയാൾ തെന്നിവീഴുകയും അബദ്ധത്തിൽ വെടി പൊട്ടുകയും ചെയ്​തു എന്നാണ്​ പരിക്കേറ്റ മനോജും മുകേഷും പൊലീസിനോട്​ പറഞ്ഞത്​. മറ്റ്​ മൂന്നുപേർ ചേർന്ന്​ പരിക്കേറ്റവരെ ആദ്യം മലയിഞ്ചിയിലും തുടർന്ന്​ ജീപ്പിൽ തൊടുപുഴയിലെ സ്വകാര്യ ആശുപത്രിയിലും എത്തിച്ചു. ഇവിടെ പ്രഥമശുശ്രൂഷ നൽകിയശേഷം കോലഞ്ചേരി മെഡിക്കൽ കോളജ്​ ആശുപത്രിയിൽ​ കൊണ്ടുപോയി. തിരയുടെ ചീള്​ തെറിച്ച്​ ഇരുവർക്കും കഴുത്തിനും വയറിനും പരിക്കേറ്റെങ്കിലും ഗുരുതരമല്ല.

സംഘത്തിലെ മറ്റംഗങ്ങളായ വെണ്ണിയാനി തൈപ്ലാത്തോട്ടത്തിൽ അനി (30), കുരുവിപ്ലാക്കൽ മധു (40), വാദ്യങ്കാവിൽ രതീഷ് (30) എന്നിവരാണ്​ അറസ്​റ്റിലായത്​. തോക്കും പിടിച്ചെടുത്തു. ഇവരെ കരിമണ്ണൂർ ഇൻസ്​പെക്​ടർ ഷിജി, എസ്.ഐ ഷംസുദ്ദീൻ, സി.പി.ഒ അനിൽ എന്നിവരുടെ നേതൃത്വത്തിൽ സംഭവസ്ഥലത്ത്​ എത്തിച്ച്​ തെളിവെടുത്തു.

ലൈസൻസില്ലാതെ തോക്ക്​ കൈവശം വെച്ചതിന്​ അഞ്ച്​ പേർക്കെതിരെയും കേസെടുത്തിട്ടുണ്ട്​. ഇവർ ഇടക്കിടെ വനത്തിൽ പോകാറുണ്ടെന്നും ഒന്നോ രണ്ടോ ദിവസം കഴിഞ്ഞാണ് മടങ്ങിയെത്തുന്നതെന്നുമാണ്​ നാട്ടുകാർ നൽകുന്ന വിവരം. നായാട്ടിനാണോ കാടുകയറിയതെന്നും വന്യമൃഗങ്ങളെ വേട്ടയാടിയിട്ടുണ്ടോ എന്നും പൊലീസ്​ അന്വേഷിക്കും​. സംഘാംഗങ്ങൾ തമ്മി​െല വഴക്കിനിടെ വെടിയുതിർത്തതാണോ എന്നും പരിശോധിക്കുന്നുണ്ട്​.