ഇടമലക്കുടിയുടെ ഇടനെഞ്ചിലുണ്ടാകും ഈ ഗുരുനാഥന്മാർ

തൊടുപുഴ: ഇടമലക്കുടിയിലെ കുട്ടിക​ൾക്ക്​ പാഠഭാഗങ്ങൾ പറഞ്ഞുകൊടുക്കാൻ ഗോത്രഭാഷ പഠിക്കുകയും അവർക്കായി ഗോത്ര പാഠാവലിയും നിഘണ്ടുവും തയാറാക്കുകയും ചെയ്​ത രണ്ട്​ അധ്യാപകർ ഏഴുവർഷത്തെ അധ്യാപനത്തിനുശേഷം കുടിയിൽനിന്ന്​ യാത്ര പറഞ്ഞിറങ്ങി. കോഴിക്കോട് സ്വദേശികളായ മേപ്പയൂർ നടുവിലക്കണ്ടി സ്വദേശി വി.സുധീഷ്, കൂവല വീട്ടിൽ ഡി.ആർ. ഷിംലാൽ എന്നിവരാണ്​ ഈ അധ്യാപകർ.

ഒരു കാലത്ത്​ ഒരു വിദ്യാർഥി മാത്രം പഠിക്കാനെത്തിയ ഇടമലക്കുടിയിലെ ഗവ. ട്രൈബൽ എൽ.പി സ്​കൂളിൽനിന്ന്​ ഇവർ പടിയിറങ്ങു​േമ്പാൾ വിദ്യാർഥികളുടെ എണ്ണം 139​ ആണ്​. കുട്ടികൾ കൂടുതലായതിനാൽ ഈ വർഷം മുതൽ ഒന്നാം ക്ലാസിൽ രണ്ട്​ ഡിവിഷനുമുണ്ട്​. കോവിഡുകാലത്ത്​ സംസ്ഥാനത്ത്​ തുറന്ന്​ പ്രവർത്തിക്കുന്ന ഏക സ്​കൂൾ കൂടിയാണ്​ ഇടമലക്കുടി.

2014ലാണ് ഇരുവരും ഇടമലക്കുടി ട്രൈബൽ യു.പി സ്കൂളിൽ അധ്യാപകരായി എത്തുന്നത്. വാഹന സൗകര്യങ്ങളൊന്നുമില്ലാതിരുന്ന അക്കാലത്ത് പെട്ടിമുടിയിൽനിന്ന്​ 18 കിലോമീറ്റർ കൊടുംവനത്തിലൂടെ നടന്നാണ്​ സ്​കൂളിലെത്തിയിരുന്നത്. വിദൂര വനമേഖലയായതിനാലും ഗോത്രഭാഷ ഉൾപ്പെടെ പ്രതികൂല സാഹചര്യം ഭയന്നും അധ്യാപകര്‍ ജോലിക്കെത്താൻ മടിച്ചിരുന്ന കാലം. നിയമിതരാകുന്നവര്‍ അവധിയില്‍ പ്രവേശിക്കുകയോ ദിവസങ്ങള്‍ക്കുള്ളില്‍ സ്ഥലംമാറ്റം വാങ്ങി പോവുകയോ ചെയ്തിരുന്നു. ആദ്യ ദിനങ്ങളിൽ​ ഒറ്റപ്പെടൽ അനുഭവിക്കേണ്ടി വന്നെങ്കിലും പെ​ട്ടെന്ന്​ കുടിയിലുള്ളവരുമായി ചങ്ങാത്തത്തിലായതായി വി. സുധീഷ്​ പറഞ്ഞു.

സ്​കൂളിലെ രജിസ്​റ്ററിൽ 12 കുട്ടികൾ ഉണ്ടായിരുന്നെങ്കിലും ഒരാൾ മാത്രമാണ്​ എത്തിയിരുന്നത്​. അന്വേഷിച്ചപ്പോൾ​ മനസ്സിലായത്​ ഗോത്ര വർഗക്കാരായ കുട്ടികൾക്ക്​ ഭാഷ ബുദ്ധിമുട്ട്​ സൃഷ്​ടിക്കുന്നുവെന്നാണ്​. മാതൃഭാഷ മലയാളമാണെങ്കിലും മുതുവാന്‍ സമുദായക്കാരായ കുട്ടികള്‍ വിദ്യാലയത്തില്‍ എത്തുമ്പോള്‍ മാത്രമേ മലയാള അക്ഷരങ്ങള്‍ കേട്ടുതുടങ്ങൂ. കുട്ടികള്‍ പറയുന്നത് തങ്ങൾക്കോ തങ്ങൾ പറയുന്നത് കുട്ടികള്‍ക്കോ മനസ്സിലാകാത്ത സാഹചര്യം.

ഇത്​ തരണംചെയ്യാൻ ആദ്യം ചെയ്​തത്​ മുതുവാൻ ഭാഷയെ മനസ്സിലാക്കാൻ ഓരോ കുടിയും സന്ദർശിക്കുക എന്നതായിരു​െന്നന്ന്​ ഇവർ പറയുന്നു. കിട്ടിയ വാക്കുകൾ എഴുതിയും പറഞ്ഞും ക്ലാസിൽ പ്രയോഗിച്ചും അവർക്കൊപ്പം കൂടി. കുട്ടികളുടെ വരവ് വർധിച്ചതോടെ കൂടുതൽ വാക്കുകൾ പഠിക്കാൻ തുടങ്ങി. മാസങ്ങൾക്കകം മൂന്നാം ക്ലാസിലെ പരിസര പഠനം എന്ന പുസ്തകത്തെ പൂർണമായി ഗോത്രഭാഷയിലേക്ക് പകർത്തി. 2020ൽ സുധീഷ്, ഷിംലാലി​െൻറ സഹായത്തോടെ മുതുവാൻ ഭാഷയിലെ 2500 വാക്കുകൾ ഉപയോഗിച്ചുള്ള ആദ്യ മുതുവാൻ ഭാഷാ നിഘണ്ടു പുറത്തിറക്കുകയായിരുന്നു. പ്രിയപ്പെട്ട അധ്യാപകർക്ക്​ വികാര നിർഭര യാത്രയയപ്പാണ്​ ഇടമലക്കുടിക്കാർ നൽകിയത്​. ബുധനാഴ്​ച തന്നെ ഇരുവരും സ്വദേശത്തെ പുതിയ സ്കൂളുകളിലെത്തി ചുമതലയേറ്റു.