ഇടമലക്കുടിയിൽ ക്ലാസ്​ മുടങ്ങിയിട്ട്​ രണ്ടാഴ്​ച

പെട്ടിമുടിയി​ലെ ഉരുൾപൊട്ടലിന്​ ശേഷം ഇടമലക്കുടിയിലെ കു​ട്ടികളുടെ പഠനം തന്നെ നിലച്ചു​. വിദൂര മേഖലയായ ഇടമലക്കുടിയിലേക്ക്​ എസ്​.എസ്​.എ മൂന്നാർ ബ്ലോക്ക്​ പ്രോഗ്രാം ഓഫിസി​െൻറ നേതൃത്വത്തിൽ ഓൺലൈൻ ക്ലാസുകൾ പെൻഡ്രൈവിലാക്കി ഇടമലക്കുടിയിലേക്ക്​ എത്തിക്കുകയായിരുന്നു ചെയ്​തിരുന്നത്​.

എന്നാൽ, ഇടമലക്കുടിയിലേക്ക്​ സ്ഥിരമായി പോയിരുന്ന ഡ്രൈവർമാരുൾപ്പെ​ടെയുള്ളവർ പെട്ടിമുടി ദുരന്തത്തിൽ മര​ണപ്പെട്ടിരുന്നു. മാത്രമല്ല, ഇടമലക്കുടിയിലേക്കുള്ള ഒരു ജീപ്പും മണ്ണിനടിയിലായി. ഈ സാഹചര്യത്തിലാണ്​ ഇവിടേക്ക്​ ഒന്നും ​എത്തിച്ചുനൽകാൻ കഴിയാത്തത്​.

മാത്രമല്ല, പെട്ടിമുടി ദുരന്തത്തിനുശേഷം ഇടമലക്കുടിയിൽ വൈദ്യുതിയും കൃത്യമായി ലഭിക്കുന്നില്ല. ഇതുമൂലം പ്രാദേശിക കേന്ദ്രങ്ങളിലടക്കം കുട്ടികൾക്ക്​ ക്ലാസുകൾ കാണിച്ചുനൽകുന്നതിനും തടസ്സം സൃഷ്​ടിക്കുന്നു.

26 കുടികളിലായി പ്രൈമറി മുതൽ പ്ലസ്​ടു വരെ പഠിക്കുന്ന നൂറോളം കുട്ടികളാണുള്ളത്​. ജില്ലയിലെ വിവിധ സ്​കൂളുകളിലെ ഹോസ്​റ്റലുകളിൽനിന്നാണ്​ ഇവർ പഠിച്ചിരുന്നത്​. എന്നാൽ, ഹോസ്​റ്റലുകൾ അടച്ചതോടെ ഇവരെല്ലാം കുടികളിലേക്കെത്തുകയായിരുന്നു.

നിലവിൽ കോവിഡ്​ പടരുന്ന സാഹചര്യത്തിൽ ഇടമലക്കുടി സ്വയം പ്രവേശന വിലക്ക്​ ഏർപ്പെടുത്തിയിരിക്കുകയാണ്​. കുടിക്ക്​ പുറത്തുള്ളവരെ ആരെയും ഇവിടേക്ക്​ പ്രവേശിപ്പിക്കില്ല.

എന്നാൽ, ഇടമലക്കുടിയിലുള്ളവരുമായി ബന്ധപ്പെടാൻ ശ്രമിക്കുന്നുണ്ടെന്നും ആനക്കുളത്തും മറ്റും എത്തി കുട്ടികൾക്കുള്ള ക്ലാസുകൾ​ പെൻഡ്രൈവിലാക്കി നൽകാൻ ശ്രമിക്കുന്നതായും എസ്​.എസ്​.എ അധികൃതർ പറഞ്ഞു.