ഇടവേളക്കുശേഷം 'പടയപ്പ' മൂന്നാറിൽ

മൂന്നാര്‍: ഒന്നരമാസത്തെ ഇടവേളക്കുശേഷം പടയപ്പ വീണ്ടും മൂന്നാറിലെത്തി. രണ്ടോടെ എത്തിയ കാട്ടുകൊമ്പൻ കാര്‍ഗില്‍ റോഡിലെ കട തകർത്ത്​ പച്ചക്കറികൾ അടക്കം ഭക്ഷിച്ചാണ് മടങ്ങിയത്. പൂര്‍ണ ലോക്ഡൗൺ കാലത്താണ്​ മുമ്പ്​ വന്നത്​.

കഴിഞ്ഞ ദിവസം മൂന്നാര്‍ പൊലീസ് സ്‌റ്റേഷനു സമീപം നിലയുറപ്പിച്ച ആന പുലര്‍ച്ച രണ്ടോടെ പോസ്‌റ്റ്​ ഓഫിസ് കവലവഴി കാര്‍ഗില്‍ റോഡില്‍ പ്രവേശിക്കുകയായിരുന്നു.

ഇവിടെ പാല്‍രാജി​െൻറ കട തകര്‍ത്ത് ചക്ക, കപ്പ, പച്ചക്കറികള്‍, പഴവര്‍ഗങ്ങള്‍ എന്നിവ അകത്താക്കി. ഏകദേശം 15,000 രൂപയുടെ നഷ്​ടമുണ്ടായതായി ഉടമ പറയുന്നു.

കാടുകയറാന്‍ കൂട്ടാക്കാത്ത ആനയെ തുരത്താന്‍ വനം വകുപ്പ് നടപടി സ്വീകരിക്കണമെന്ന ആവശ്യവുമായി നാട്ടുകാര്‍ രംഗത്തെത്തി.