പണ്ട്​ കുപ്പത്തൊട്ടി... ഇന്ന് മനോഹരമീ പച്ചത്തുരുത്ത്

തൊടുപുഴ: അറവുശാലയില്‍നിന്ന്​ ഉൾപ്പെടെ സകലമാലിന്യവും ആര്‍ക്കും വലിച്ചെറിയാവുന്ന കുപ്പത്തൊട്ടിയായിരുന്നു ഒരുവര്‍ഷം മുമ്പ് കാഞ്ഞാറിലെ എം.വി.ഐ.പിവക ഒരേക്കറോളം ഭൂമി. പലരും കൈയേറി കൃഷിയും അനധികൃത നിര്‍മാണവുമെല്ലാം നടത്തിയിരുന്ന ആനക്കയം റോഡിലെ ഈ ഒരേക്കറോളം ഭൂമി ഇന്ന് മനോഹരമായൊരു പച്ചത്തുരുത്താണ്. ചെറുതും വലുതുമായ ആയിരത്തിലേറെ വൃക്ഷത്തൈകള്‍ പനപോലെ വളരുന്ന ചെറുവനം. 

ഹരിതകേരളവും വെള്ളിയാമറ്റം ഗ്രാമപഞ്ചായത്തി​​െൻറ തൊഴിലുറപ്പ് പദ്ധതിയുമൊത്ത്​ ചേര്‍ന്നാണ് കഴിഞ്ഞ ജൂണ്‍ 16നാണ് ​ഈ പച്ചത്തുരുത്ത് നാടിനു സമര്‍പ്പിച്ചത്.  250 വൃക്ഷത്തൈകളില്‍ തുടങ്ങിയ ഈ പച്ചത്തുരുത്തില്‍ ഇപ്പോള്‍ പുളിയും പ്ലാവും മാവും നെല്ലിയും അത്തിയും ആര്യവേപ്പും ഇത്തിയും മരുതും മഹാഗണിയും തുടങ്ങി 1400ഓളം ഇനങ്ങളുണ്ട്. പത്തടിയോളം വളർന്നിരിക്കുന്നു ഇവ. ചുറ്റിനും ചെമ്പരത്തിയും ഈറ്റയുമൊക്കെയൊരുക്കിയ മനോഹരമായ ജൈവവേലിയുമുണ്ട്.

തൊഴിലുറപ്പ് തൊഴിലാളികളാണ്​ ഇവയെ ഭദ്രമായി പരിപാലിക്കുന്നത്​. മിക്കവാറും15 പേരുണ്ടാകും. സമീപത്തുനിന്നും സ്വന്തം വീടുകളില്‍നിന്നുമെല്ലാം ചാണകം കൊണ്ടുവന്ന് ഇവര്‍ വളമേകും. കാട് കയറാതെ ചെറിയ കളകള്‍പോലും നീക്കും. നിശ്ചിത ഇടവേളകളില്‍ മണ്ണ് കൂട്ടിക്കൊടുക്കും. ഈ ഭൂമി നേര​േത്ത കൈയടക്കി​െവച്ചിരുന്ന ചിലര്‍ ഈ തൊഴിലാളികളെ കൈയേറ്റത്തിനു മുതിര്‍ന്നിരുന്നു. എന്നാല്‍, നാട്ടുകാരും പഞ്ചായത്ത് പ്രസിഡൻറും രാഷ്​ട്രീയ നേതാക്കളും ഇടപെട്ടതോടെ അത് അവസാനിച്ചു. 

കാഞ്ഞാറിലെ പച്ചത്തുരുത്ത് വ്യാപിപ്പിക്കുന്നതിന്​ എം.വി.ഐ.പിക്ക്​ കത്ത് നല്‍കിയിട്ടുണ്ട്. അവരുടെ അനുമതി ലഭിച്ചാലുടന്‍ വ്യാപനമുണ്ടാകും. പൂമാല ഗവ. സ്‌കൂള്‍, വെട്ടിമറ്റം ഗവ. സ്‌കൂള്‍ എന്നിവിടങ്ങളില്‍ പുതിയ പച്ചത്തുരുത്തുകള്‍ രൂപപ്പെടുത്തുമെന്നും പ്രസിഡൻറ്​ ഷീബ രാ​ജശേഖരൻ പറഞ്ഞു.