IDL102 വാഗ്ദാനങ്ങൾ കേട്ടുമടുത്തു; ഇനി സമരം

കൊച്ചുചേലച്ചുവട്​ റോഡിനോടുള്ള അവഗണനയിൽ പ്രതിഷേധം ചെറുതോണി: വാഗ്ദാനങ്ങൾ കേട്ടുമടുത്ത നാട്ടുകാർ കത്തിപ്പാറത്തടത്തുനിന്ന്​ ഇടക്കാടുവഴി കൊച്ചുചേലച്ചുവടിലേക്കുള്ള റോഡിനോടുള്ള അധികൃതരുടെ അവഗണനയിൽ പ്രതിഷേധിച്ച്​ സമരത്തിനൊരുങ്ങുകയാണ്​. 60 വർഷം പഴക്കമുള്ള റോഡ് നൂറുകണക്കിന്​ കുടുംബങ്ങളുടെ ഏക ആശ്രയമാണ്​. ആലപ്പുഴ-മധുര സംസ്ഥാന പാതയോട് ബന്ധിപ്പിക്കുന്ന കഞ്ഞിക്കുഴി പഞ്ചായത്തിലെ പ്രധാനപ്പെട്ട റോഡാണിത്. അഞ്ച്​ കിലോമീറ്റർ ദൂരമുള്ള റോഡ് ടാർ ചെയ്തു ഗതാഗതയോഗ്യമാക്കണമെന്ന്​ ആവശ്യപ്പെട്ട്​ കൊച്ചുചേലച്ചുവട്ടിലുള്ളവർ നിവേദനവും പ്രതിഷേധവുമായി രംഗത്തെത്തിയപ്പോൾ ഒന്നര കിലോമീറ്റർ ടാർ ചെയ്​തു. തുടർന്ന്​ നിർമാണം നിലച്ചു. പിന്നീട് കത്തിപ്പാറത്തടം ഭാഗത്തുള്ളവർ പ്രതിഷേധവുമായി റോഡിലിറങ്ങിയപ്പോൾ മറുവശത്തുനിന്ന്​ ഒന്നര കിലോമീറ്റർ ദൂരവും ടാർ ചെയ്തു. ഇപ്പോൾ നടുഭാഗം അനാഥമായിക്കിടക്കുകയാണ്​. ഏറ്റവുമൊടുവിൽ കഴിഞ്ഞ ലോക്​സഭ തെരഞ്ഞെടുപ്പിൽ നാട്ടുകാർ വോട്ട്​ ബഹിഷ്കരിക്കാനൊരുങ്ങിയപ്പോൾ വീണ്ടും വാഗ്ദാനങ്ങളുമായി സ്ഥാനാർഥികളെത്തി. എന്നാൽ, ജയിച്ചുപോയവരാരും പിന്നീട്​ ഇതുവഴി വന്നില്ല. ഇത്തവണ ത്രിതല പഞ്ചായത്ത്​ തെരഞ്ഞെടുപ്പിനു മുമ്പ്​ സമരത്തിനിറങ്ങിയപ്പോൾ പൊതുമരാമത്ത് എക്സി.എൻജിനീയർ റോഡ് സന്ദർശിച്ച് നിർമാണം ഉടൻ നടത്തുമെന്ന് വാക്കുനൽകിയതോടെ നാട്ടുകാർ വീണ്ടും പ്രതീക്ഷയിലായിരുന്നു. എന്നാൽ, മാസങ്ങൾ കഴിഞ്ഞിട്ടും തുടർനടപടിയുണ്ടായില്ല. ഇതോടെയാണ്​ നാട്ടുകാർ സമരത്തിനൊരുങ്ങുന്നത്​. ഫോട്ടോ..... തകർന്ന കത്തിപ്പാറ-ഇടക്കാട്-കൊച്ചുചേലച്ചുവട് റോഡ്