ആർപ്പൂക്കരയിൽ പാടം നികത്തൽ വ്യാപകം

ഗാന്ധിനഗർ: ആർപ്പൂക്കര പഞ്ചായത്തി‍െൻറ പടിഞ്ഞാറൻ മേഖലകളിലെ നെൽപാടങ്ങൾ വൻതോതിൽ നികത്തുന്നതായി പരാതി. ഏക്കറുകണക്കിന് പാടശേഖരങ്ങളാണ് അനധികൃതമായി മണ്ണടിച്ച് പുരയിടങ്ങളാക്കുന്നത്. മെഡിക്കൽ കോളജ്-ചീപ്പുങ്കൽ റോഡിനോട് ചേർന്ന മണിയാപറമ്പ്, കരിപ്പ, കരിപ്പൂത്തട്ട്, കുമരംകുന്ന് പ്രദേശങ്ങളിലെ പാടശേഖരങ്ങളാണ് നികത്തുന്നത്.

കൃഷിചെയ്തുകൊണ്ടിരിക്കുന്ന നിലങ്ങളിലും വർഷങ്ങളായി കൃഷി ചെയ്യാത്ത നിലങ്ങളിലുമെല്ലാം മണ്ണടിച്ച് പൊക്കി കരഭൂമിയാക്കി മാറ്റുന്നു. വീടുവെക്കാൻ അഞ്ചു സെന്‍റുവരെ നിലം നികത്താമെന്നുള്ള വ്യവസ്ഥയെ ദുരുപയോഗം ചെയ്തുകൊണ്ടാണ് ഈ ഭാഗങ്ങളിൽ വ്യാപക നികത്തൽ.

മെഡിക്കൽ കോളജ്-ചീപ്പുങ്കൽ റോഡ് യാഥാർഥ്യമാകുന്നതോടെ ഈ മേഖലയിലെ ഭൂമിക്ക് നല്ലവില വരുമെന്നതിനാലാണ് പാടശേഖരങ്ങൾ വലിയതോതിൽ നികത്തുന്നതെന്ന് നാട്ടുകാർ പറയുന്നു. ഇതിന് ബന്ധപ്പെട്ട ഉദ്യോഗസ്ഥരുടെ മൗനാനുവാദവും ഉണ്ടെന്ന ആക്ഷേപവുമുണ്ട്.

പുലർച്ച നാലു മുതൽ എട്ടുവരെ ഈ മേഖലയിലേക്ക് നിരവധി ടിപ്പറുകളാണ് മണ്ണുമായി എത്തുന്നത്. ടിപ്പറുകളുടെ അമിത വേഗം പുലർച്ച വ്യായാമത്തിനായി ഇറങ്ങുന്ന കാൽനടക്കാർക്ക് ഭീതിയുണ്ടാക്കുന്നതായും പരാതിയുണ്ട്. മന്ത്രിക്കും കലക്ടർക്കും പരാതി നൽകാൻ ഒരുങ്ങുകയാണ് നാട്ടുകാർ.പാടങ്ങൾ നികത്തുന്നത് രൂക്ഷമായ വെള്ളപ്പൊക്കത്തിനു കാരണമാകുമെന്നും നാട്ടുകാർ പറയുന്നു.