സുരക്ഷാ വീഴ്ച: പരിശോധനയിൽ ഡാം സുരക്ഷിതം

ചെറുതോണി (ഇടുക്കി): ചെറുതോണി അണക്കെട്ടിൽ ഉണ്ടായ സുരക്ഷാ വീഴ്ചയുടെ പശ്ചാത്തലത്തിൽ ഡാമിന്‍റെ ഷട്ടറുകൾ ഉയർത്തി പരിശോധിച്ചു. ഡാം സുരക്ഷാ വിഭാഗം ഉദ്യോഗസ്ഥരുടെ നേതൃത്വത്തിലായിരുന്നു അഞ്ച്​ ഷട്ടറുകൾ ഉയർത്തിയുള്ള പരിശോധന.

ഡാം പൂർണ സുരക്ഷിതമാണെന്ന് പരിശോധനക്കുശേഷം ഡെപ്യൂട്ടി ചീഫ് എൻജിനീയർ പി.എൻ. ബിജു പറഞ്ഞു. റോപ്പിന്​ കേടുപാടൊന്നുമില്ലെന്നും റിപോർട്ട്​ ചീഫ്​ എൻജിനീയർക്ക്​ നൽകുമെന്നും ഇദ്ദേഹം പറഞ്ഞു.

ജൂൺ 22നാണ്​ അണക്കെട്ടിൽ അതി​ക്രമിച്ച്​ കയറിയ ഒറ്റപ്പാലം സ്വദേശിയായ യുവാവ്​ ഡാമിനോടനുബന്ധിച്ച ഹൈമാസ്റ്റ്​ ലൈറ്റുകളിലടക്കം പത്തോളം താഴിട്ട്​ പൂട്ടിയത്​. ഷട്ടർ ഉയർത്തുന്ന ഭാഗങ്ങളിലടക്കം യുവാവ്​ എത്തിയെന്ന വിവരങ്ങളു​ടെ അടിസ്ഥാനത്തിലായിരുന്നു പരിശോധന.

സുരക്ഷാ വീഴ്ചയുണ്ടായ സാഹചര്യത്തിൽ താൽക്കാലിക ജീവനക്കാരെ മാറ്റി പകരം പൊലീസ്​ ഉദ്യോഗസ്ഥരെ നിയമിച്ചിട്ടുണ്ട്​. ഇടുക്കി, ചെറുതോണി അണക്കെട്ടുകളിലെ സി.സി ടി.വി കാമറകൾ പരിശോധിക്കാൻ ചുമതലപ്പെടുത്തിയിരുന്ന രണ്ട്​ ജീവനക്കാരെയാണ്​​ മാറ്റിയത്​.

ഹൈമാസ്റ്റ്​ ലൈറ്റുകളിൽ താഴിട്ട് പൂട്ടിയ ആൾ ഷട്ടർ ഉയർത്താൻ ഉപയോഗിക്കുന്ന ഇരുമ്പുവടത്തിൽ എന്തോ ഒഴിക്കുന്നതായി സി.സി ടി.വി ദൃശ്യങ്ങളിൽനിന്ന്​ ബോധ്യപ്പെട്ടിരുന്നു. ഇതിന്‍റെ സാമ്പിൾ രാസപരിശോധനക്ക്​ അയച്ചിട്ടുണ്ട്.

ഇരുമ്പുവടത്തിന് ബലക്ഷയമില്ലെന്നാണ് കെ.എസ്.ഇ.ബി അറിയിച്ചിരുന്നെങ്കിലും ഷട്ടർ ഉയർത്തി പരിശോധിക്കണമെന്ന നിർദേശത്തിന്‍റെ അടിസ്ഥാനത്തിൽ ഉയർത്തുകയായിരുന്നു.

സന്ദർശകർക്ക് അനുമതിയില്ലാത്ത ബുധനാഴ്ച പരിശോധന നടത്താനാണ് ആദ്യം തീരുമാനിച്ചിരുന്നത്​​. എന്നാൽ, കാലതാമസം ഒഴിവാക്കാനായി ചൊവ്വാഴ്ചയാക്കി.

അണക്കെട്ടിൽ അതിക്രമിച്ചു​ കയറിയ ശേഷം വിദേശത്തേക്ക് കടന്ന യുവാവിനെ പിടികൂടാൻ ലുക്കൗട്ട് നോട്ടീസിറക്കാനും നീക്കം നടക്കുന്നുണ്ട്. പൊലീസാണ്​ തുടർനടപടികൾ സ്വീകരിക്കേണ്ടതെന്നാണ്​ ഡാം സേഫ്​റ്റി ഉദ്യോഗസ്ഥർ പറയുന്നത്​.

പരിശോധനയുടെ ഭാഗമായി ചെറുതോണി അണക്കെട്ടിന്‍റെ ഷട്ടറുകൾ ഉയർത്തി പരിശോധിച്ചപ്പോൾ