ഡി​സം​ബ​റി​ലെ പു​ല​ർ​കാ​ല ത​ണു​പ്പ് തേ​ടി ഇടുക്കിയിലേക്ക് സഞ്ചാരികള്‍ ഒഴുകുന്നു

അ​ടി​മാ​ലി (ഇടുക്കി): കോ​വി​ഡ് ഭീ​തി മാ​റ്റി​വെ​ച്ച് ഹൈ​റേ​ഞ്ചി​ലേ​ക്ക് സ​ഞ്ചാ​രി​ക​ളു​ടെ ഒ​ഴു​ക്ക്. ഡി​സം​ബ​റി​ലെ പു​ല​ർ​കാ​ല ത​ണു​പ്പ് തേ​ടി​യാ​ണ് കൂ​ടു​ത​ല്‍പേ​രും എ​ത്തു​ന്ന​ത്. മൂ​ന്നാ​ര്‍, സൂ​ര്യ​നെ​ല്ലി, ദേ​വി​കു​ളം, വ​ട്ട​വ​ട, ആ​ന​ക്കു​ളം, മാ​ട്ടു​പ്പെ​ട്ടി, വാ​ള​റ, ഇ​ര​വി​കു​ളം, മ​റ​യൂ​ര്‍, വാഗമൺ തു​ട​ങ്ങി എ​ല്ലാ മേ​ഖ​ല​യി​ലും സ​ഞ്ചാ​രി​ക​ളു​ടെ തി​ര​ക്ക് വ​ര്‍ധി​ച്ചു.

ക്രി​സ്​​മ​സ്-​പു​തു​വ​ത്സ​ര സീ​സ​ണ്‍ അ​ടു​ത്തു​വ​രു​ന്ന​ത് അ​ന്യ​ദേ​ശ സ​ഞ്ചാ​രി​ക​ള്‍ റി​സോ​ര്‍ട്ടു​ക​ളും മ​റ്റും ബു​ക്ക്​ ചെ​യ്യു​ന്ന​ത് പ്ര​തീ​ക്ഷ​യോ​ടെ​യാ​ണ് ഹൈ​റേ​ഞ്ചു​കാ​ര്‍ കാ​ണു​ന്ന​ത്. അ​ട​ഞ്ഞു​കി​ട​ന്ന ഹോം ​സ്‌​റ്റേ​ക​ളും റി​സോ​ര്‍ട്ടു​ക​ളും പ​തി​യെ ഉ​ണ​ര്‍ന്നു​വ​രു​ന്ന​തി​െൻറ ല​ക്ഷ​ണ​വും കാ​ണു​ന്നു. വെ​ള്ളി, ശ​നി ദി​വ​സ​ങ്ങ​ളി​ല്‍ വ​ലി​യ തി​ര​ക്കാ​ണ് ടൂ​റി​സ്​​റ്റ്​ പോ​യ​ൻ​റു​ക​ളി​ല്‍ ക​ണ്ട​ത്. കോ​വി​ഡ് ആ​ശ​ങ്ക​യി​ൽ നി​ല​ച്ച വി​നോ​ദ​സ​ഞ്ചാ​ര​കേ​ന്ദ്ര​ങ്ങ​ളി​ലേ​ക്ക്​ ഇ​ത​ര സം​സ്ഥാ​ന​ങ്ങ​ളി​ൽ​നി​ന്ന്​ സ​ഞ്ചാ​രി​ക​ളെ​ത്തു​ന്നു​ണ്ട്.

എ​ന്നാ​ല്‍, ത​മി​ഴ്‌​നാ​ട്ടി​ലേ​ക്കും തി​രി​ച്ചും യാ​ത്ര ചെ​യ്യു​ന്ന​തി​ന് പാ​സ് നി​ബ​ന്ധ​ന വീ​ണ്ടും കൊ​ണ്ടു​വ​ന്ന​ത് ആ​ശ​ങ്ക​യോ​ടെ​യാ​ണ് ജി​ല്ല കാ​ണു​ന്ന​ത്. നാ​ട്ടി​ന്‍പു​റ​ങ്ങ​ളെ​ന്നോ ന​ഗ​ര​ങ്ങ​ളെ​ന്നോ വ്യ​ത്യാ​സ​മി​ല്ലാ​തെ ജി​ല്ല​യി​ലെ പ്ര​ധാ​ന ടൂ​റി​സം സ​ങ്കേ​ത​ങ്ങ​ളി​ലെ​ല്ലാം സ​ഞ്ചാ​രി​ക​ള്‍ കൂ​ട്ട​ത്തോ​ടെ എ​ത്തു​ന്നു​ണ്ട്. മ​ഴ​മാ​റി വൈ​കു​ന്നേ​ര​ങ്ങ​ളി​ലും രാ​ത്രി​യി​ലും പു​ല​ര്‍കാ​ല​ത്തു​മെ​ല്ലാം ത​ണു​പ്പ്​ തു​ട​ങ്ങി​യ​ത്​ സ​ഞ്ചാ​രി​ക​ള്‍ക്ക് വേ​റി​ട്ട അ​നു​ഭ​വ​മാ​ണ് സ​മ്മാ​നി​ക്കു​ന്ന​ത്. നേ​ര്യ​മം​ഗ​ലം മു​ത​ല്‍ മൂ​ന്നാ​ര്‍വ​രെ​യും ഇ​ട​വി​ടാ​തെ വാ​ഹ​ന​ങ്ങ​ളി​ല്‍ സ​ഞ്ചാ​രി പ്ര​വാ​ഹ​മാ​യി​രു​ന്നു ശ​നി​യാ​ഴ്ച. അ​തേ​സ​മ​യം, വ​ന്യ​ജീ​വി​ക​ളെ കാ​ണാ​നെ​ത്തി​യ​വ​രി​ല്‍ മ​ഹാ​ഭൂ​രി​പ​ക്ഷ​വും നി​രാ​ശ​രാ​യി.

അ​പൂ​ര്‍വ​യി​നം ചെ​ടി​ക​ളു​ടെ​യും ഓ​ര്‍ക്കി​ഡു​ക​ളു​ടെ​യു​മെ​ല്ലാം ക​ല​വ​റ​യാ​ണ് ഷോ​ല നാ​ഷ​ന​ല്‍ പാ​ര്‍ക്ക്. പ്ര​കൃ​തി ഭം​ഗി​ക്കും ആ​സ്വാ​ദ്യ​മാ​യ കാ​ലാ​വ​സ്ഥ​ക്കും ഒ​പ്പം ത​മി​ഴ്‌​നാ​ട്ടി​ല്‍നി​ന്ന് എ​ളു​പ്പ​ത്തി​ല്‍ എ​ത്തി​പ്പെ​ടാ​നു​ള്ള സൗ​ക​ര്യ​വും ഇ​വി​ടേ​ക്ക്​ ആ​ളു​ക​ളെ ആ​ക​ര്‍ഷി​ക്കു​ന്ന​താ​ണ്. സ്‌​കൂ​ളു​ക​ള്‍ അ​ട​ഞ്ഞു​കി​ട​ക്കു​ന്ന​തി​നാ​ല്‍ കു​ടും​ബ​സ​മ്മേ​തം എ​ത്തു​ന്ന​വ​രു​മു​ണ്ട്. ബൈ​ക്കു​ക​ളി​ല്‍ എ​ത്തു​ന്ന യു​വാ​ക്ക​ളും കു​റ​വ​ല്ല. എ​ന്നാ​ല്‍, ഹോ​ട്ട​ലു​ക​ളി​ലും വാ​ണി​ജ്യ സ്ഥാ​പ​ന​ങ്ങ​ളി​ലും തി​ര​ക്ക് കൂ​ടു​ന്നി​ല്ല. ഭ​ക്ഷ​ണ​വും മ​റ്റു​മാ​യി എ​ത്തു​ന്ന​വ​ര്‍ രാ​ത്രി​യോ​ടെ മ​ട​ങ്ങു​ക​യും ചെ​യ്യു​ന്നു.