പീഡനക്കേസ്​ പ്രതി കോവിഡ്​ ചികിത്സ കേന്ദ്രത്തിൽ നിന്ന്​ മുങ്ങി വനത്തിൽ ഒളിച്ചു

അടിമാലി: പീഡനക്കേസ്​ പ്രതി ഫസ്​റ്റ്​ലൈൻ ട്രീറ്റ്മെൻറ്​ കേന്ദ്രത്തിൽനിന്ന്​ മുങ്ങി വനത്തിൽ ഒളിച്ചു. മാമലക്കണ്ടം ഇളം പ്ലാശ്ശേരിപാറയ്ക്കൽ മുത്തു രാമകൃഷണനാണ്​ (19) വനത്തിൽ ഒളിച്ചത്. കുട്ടമ്പുഴ പൊലീസ്​ ചാർജ് ചെയ്ത പീഡനക്കേസിലെ പ്രതിയാണ്. കോടതിയിൽ ഹാജരാക്കുന്നതിന് മുന്നോടിയായി നടത്തിയ പരിശോധനയിൽ കോവിഡ് പോസിറ്റിവായതോടെ നെടുമ്പാശ്ശേരിയിൽ ഫസ്​റ്റ്​ ലൈൻ ട്രീറ്റ്മെൻറ്​ സെൻററിൽ പ്രവേശിപ്പിച്ചിരുന്നു.

ചൊവ്വാഴ്ച വൈകീട്ട് നാലിന് നഴ്സി​െൻറ മൊബൈൽ ഫോണുമായി ഇവിടെനിന്ന്​ മുങ്ങി. ടാക്സി ഓട്ടോയിൽ കോതമംഗലത്ത് ഇറങ്ങി ഓട്ടോ ടാക്സിക്ക് പണംനൽകാതെ മുങ്ങി. പിന്നീട് ഇരുമ്പുപാലത്ത് എത്തിയ ഇയാൾ ചില ടാക്സി വാഹനങ്ങൾ വിളിക്കാൻ ശ്രമിച്ചെങ്കിലും വിജയിച്ചില്ല. തുടർന്ന്​ ഒഴുവത്തടത്ത് എത്തി ടാക്സി ഓട്ടോ വിളിച്ച് മാമലക്കണ്ടത്ത് ഇറങ്ങി.

ഇതിനിടെ കുട്ടമ്പുഴ പൊലീസ്​ ഇയാളെ തിരക്കി എത്തിയതോടെ റിസർവ്​ വനത്തിൽ ഒളിക്കുകയായിരുന്നു. കാട്ടാന ഉൾപ്പെടെ വന്യജീവികളുടെ വിഹാര കേന്ദ്രമാണ് ഇവിടം.

വനംവകുപ്പി​െൻറ സഹായത്തോടെ പൊലീസും ആരോഗ്യപ്രവർത്തകരും വനത്തിൽ തിരച്ചിൽ ഉൗജിതമാക്കി. രക്ഷപ്പെടുന്ന സമയത്ത് കാവിമുണ്ടും ചുവന്ന ഷർട്ടുമാണ് ധരിച്ചിരുന്നത്. മുടി നീട്ടിവളർത്തിയ പ്രതിയെ കണ്ടെത്തിയാൽ പൊലീസിനെ അറിയിക്കണമെന്ന് ആവശ്യപ്പെട്ടിട്ടുണ്ട്​. സംഭവത്തിൽ അങ്കമാലി പൊലീസ്​ കേസ്​ രജിസ്​റ്റർ ചെയ്ത് അന്വേഷണം ആരംഭിച്ചു.