ദേശീയപാതയിൽ ചുവടിളകി വൻ മരങ്ങൾ; യാത്രക്കാർ ഭീതിയിൽ

അടിമാലി: ​െകാച്ചി-ധനുഷ്കോടി ദേശീയപാതയിൽ നേര്യമംഗലം മുതൽ വാളറവരെ യാത്ര ഭീതിയിൽ. ചുവടിളകി നിൽക്കുന്ന വൻമരങ്ങൾ ഏതുനിമിഷവും നിലംപതിക്കാവുന്ന അവസ്ഥയാണ്​. രണ്ടാഴ്ചക്കിടെ പത്തിലേറെ മരങ്ങളാണ് പ്രദേശത്ത്​ നിലംപൊത്തിയത്. പാതിരാത്രിയായതിനാൽ ദുരന്തം പലതും ഒഴിവായി. ദേശീയപാത വികസനവുമായി ബന്ധപ്പെട്ട് വീതി കൂട്ടൽ ജോലി നടക്കുന്നതി​െൻറ ഭാഗമായി മണ്ണെടുത്തപ്പോഴാണ്​ നിരവധി മരങ്ങളുടെ ചുവടിളകിയത്​. ഇതിനൊപ്പം കനത്ത മഴയിൽ മണ്ണെ‍ാലിച്ചുപോയും ഭീതി വർധിപ്പിച്ചു.

2014ൽ ചീയപ്പാറ മലയിടിച്ചിൽ ദുരന്തമുണ്ടായപ്പോൾ അന്നത്തെ മുഖ്യമന്ത്രിയോട്​ നാട്ടുകാർ പരാതി പറഞ്ഞതോടെ അപകടാവസ്ഥയിലുള്ള മരങ്ങൾ ഉടൻ വെട്ടിമാറ്റാൻ വനംവകുപ്പിന് നിർദേശം നൽകി. പരിശോധനയിൽ 390മരം അപകടാവസ്ഥയിൽ നിൽക്കുന്നതായി കണ്ടെത്തി. കുറച്ചുമരങ്ങൾ മാത്രമാണ്​ വനംവകുപ്പ് വെട്ടിയത്​. 20ലേറെ മരങ്ങൾ ഉണങ്ങി നിൽക്കുന്നു. 1997ൽ ആറാംമൈൽ, അഞ്ചാംമൈൽ എന്നിവിടങ്ങളിൽ ഉരുൾപൊട്ടിയിരുന്നു. അഞ്ചാം ​െമെലിൽ ഉരുൾപെ‍ാട്ടലിൽ ഒഴുകിയെത്തിയ വലിയ മരങ്ങളും കല്ലുകളുമാണ്​ വീടുകളടക്കം തകർത്തത്. മരങ്ങൾ മുറിച്ചു നീക്കണമെന്ന് ആവശ്യപ്പെട്ട് പ്രദേശവാസികൾ നിരവധി തവണ വനംവകുപ്പിന് പരാതി നൽകിയിരുന്നു.