എസ്​.എസ്​.എൽ.സി: ജില്ലയിൽ വിജയം 99.17 ശതമാനം

തൊടുപുഴ: കോവിഡ്​ പ്രതിസന്ധി അതിജീവിച്ച്​ എസ്​.എസ്​.എൽ.സി പരീക്ഷയെ നേരിട്ട ജില്ലയിലെ വിദ്യാർഥികൾക്ക്​ ഇത്തവണയും മികച്ച വിജയം. 99.17 ആണ്​ വിജയശതമാനം. കഴിഞ്ഞവർഷം 99.38 ശതമാനമായിരുന്നു. 119 സ്കൂളുകൾ 100​ ശതമാനം വിജയം നേടി. എന്നാൽ, മുഴുവൻ വിഷയങ്ങൾക്കും എ പ്ലസ്​ നേടിയവരുടെ എണ്ണത്തിൽ ഇത്തവണ ഗണ്യമായ കുറവുണ്ടായി. കഴിഞ്ഞവർഷം 2785 പേർ ഫുൾ എ പ്ലസിന്​ അർഹരായപ്പോൾ ഇത്തവണ ഇത്​ 752 ആണ്​. 5878 ആൺകുട്ടികളും 5511 പെൺകുട്ടികളുമടക്കം 11,389 വിദ്യാർഥികളാണ്​ ജില്ലയിൽ പരീക്ഷ എഴുതിയത്​. ഇതിൽ 5816 ആൺകുട്ടികളും 5478 പെൺകുട്ടികളുമടക്കം 11,294 വിദ്യാർഥികൾ ഉപരിപഠനത്തിന്​ അർഹതനേടി. തൊടുപുഴ വിദ്യാഭ്യാസ ജില്ലയിൽ പരീക്ഷയെഴുതിയ 4882 വിദ്യാർഥികളിൽ 4839 പേർ ഉപരിപഠനത്തിന്​ അർഹരായി. വിജയശതമാനം -99.12. കട്ടപ്പന വിദ്യാഭ്യാസ ജില്ലയിൽ പരീക്ഷ എഴുതിയ 6507 വിദ്യാർഥികളിൽ 6455പേർ വിജയിച്ചു. 99.2 ശതമാനമാണ്​ വിജയം. തൊടുപുഴയിൽ 105 ആൺകുട്ടികളും 286 പെൺകുട്ടികളുമടക്കം 391 പേർക്കും കട്ടപ്പനയിൽ 93 ആൺകുട്ടികളും 168 പെൺകുട്ടികളുമടക്കം 361 പേർക്കും മുഴുവൻ വിഷയങ്ങൾക്കും എ പ്ലസ്​ ലഭിച്ചു. കഴിഞ്ഞവർഷം തൊടുപുഴ വിദ്യാഭ്യാസ ജില്ലയിൽ 99.35ഉം കട്ടപ്പനയിൽ 99.4ഉം ആയിരുന്നു​ വിജയശതമാനം. സർക്കാർ മേഖലയിലെ 54ഉം 59 എയ്​ഡഡും 10​ അൺ എയ്​ഡഡുമടക്കം ജില്ലയിലെ 123 സ്കൂളുകളാണ്​ കഴിഞ്ഞതവണ നൂറുമേനി വിജയം നേടിയത്​. ജില്ലയിൽ ഏറ്റവും കൂടുതൽ വിദ്യാർഥികൾ പരീക്ഷയെഴുതിയ സർക്കാർ സ്കൂൾ കല്ലാർ ജി.എച്ച്​.എസാണ്:​ 378 പേർ. എയ്​ഡഡിൽ കരിമണ്ണൂർ സെന്‍റ്​ ജോസഫ്​സ്​ എച്ച്​.എസ്​.എസും (322) അൺ എയ്​ഡഡിൽ കട്ടപ്പന ഒ.ഇ.എം.എസ്​.എച്ചും (171) ആണ്​ വിദ്യാർഥികളുടെ എണ്ണത്തിൽ ഒന്നാംസ്ഥാനത്ത്​.