സ്വന്തം പഞ്ചായത്ത് ഓഫിസിലേക്ക്​ ഇടമലക്കുടിക്കാർ സഞ്ചരിക്കേണ്ടത്​ 40 കി.മീ

മൂന്നാർ: സർക്കാർ സേവനങ്ങൾ വീട്ടുപടിക്കൽ എത്തിക്കാനും സേവനം അവകാശമാക്കാനും നിരവധി പദ്ധതികൾ ആവിഷ്കരിക്കുമ്പോഴും സ്വന്തം പഞ്ചായത്ത് ഓഫിസിലെത്താൻ ഇടമലക്കുടിയിലെ ആദിവാസി കുടുംബങ്ങൾക്ക്​ ദിവസം മുഴുവൻ യാത്ര. ദേവികുളത്ത് പ്രവർത്തിക്കുന്ന തങ്ങളുടെ പഞ്ചായത്ത് ഓഫിസിലെത്താൻ ഇവർ സഞ്ചരിക്കേണ്ടത്​ 40 കി.മീ. ഇടമലക്കുടി കേരളത്തിലെ ഏക ഗോത്രവർഗ പഞ്ചായത്തായ കാലം മുതൽ പഞ്ചായത്ത് ഓഫിസ് പ്രവർത്തിക്കുന്നത് താലൂക്ക് ആസ്ഥാനമായ ദേവികുളത്താണ്. ഇടമലക്കുടിയിലെ ഏറ്റവും അകലെയുള്ള കുടിയിൽനിന്ന്​ ഇവിടെയെത്താൻ 40 കിലോമീറ്ററോളം സഞ്ചരിക്കണം. ഏതെങ്കിലും സർട്ടിഫിക്കറ്റുകൾ വാങ്ങി മടങ്ങാൻ ഇത്രയും ദൂരം സഞ്ചരിക്കേണ്ട ഗതികേടിലായതോടെ തങ്ങൾക്കായി പഞ്ചായത്ത് രൂപവത്​കരിച്ചത് എന്തിനാണെന്നാണ് ഇവരുടെ ചോദ്യം. പഞ്ചായത്ത് രൂപവത്​കരിച്ച സമയത്ത് തന്നെ സൊസൈറ്റിക്കുടിയിൽ പഞ്ചായത്ത് ഓഫിസ്​​ കെട്ടിടം നിർമിച്ചിരുന്നു. ബോർഡുവരെ സ്ഥാപിച്ചെങ്കിലും പ്രവർത്തനം തുടങ്ങിയില്ല. ജീവനക്കാർ ഇവിടെ താമസിച്ച് ജോലിചെയ്യാൻ തയാറാകാത്തതാണ് ഓഫിസ് ദേവികുളത്ത് തന്നെ നിലനിർത്താൻ കാരണമെന്നാണ്​ സൂചന. പഞ്ചായത്ത് കമ്മിറ്റി ചേരുന്നതിന് പ്രസിഡന്റ് അടക്കമുള്ള അംഗങ്ങൾ ദേവികുളത്ത്​ എത്തി മടങ്ങുകയാണ് പതിവ്. വർഷങ്ങൾ കഴിഞ്ഞിട്ടും ദുരവസ്ഥക്ക്​ മാറ്റമില്ലാതായതോടെ ഇവരുടെ പ്രതീക്ഷയും അവസാനിച്ച മട്ടാണ്. കോടിക്കണക്കിന് രൂപയാണ് ഇടമലക്കുടിയുടെ വികസനത്തിനായി ഓരോ വർഷവും വകയിരുത്തുന്നത്. കുട്ടികളുടെ വിദ്യാഭ്യാസമടക്കം ആവശ്യങ്ങൾക്ക്​ സർട്ടിഫിക്കറ്റുകൾ വേണ്ടിവരുമ്പോൾ ദിവസം മുഴുവൻ സഞ്ചരിച്ച് പഞ്ചായത്ത് ഓഫിസിൽ എത്തേണ്ട സ്ഥിതിക്ക്​ പരിഹാരം കാത്തുകഴിയുകയാണ്​ ഇവർ. ചിത്രം 1 ഇടമലക്കുടി പഞ്ചായത്ത് ഓഫിസിനായി നിർമിച്ച കെട്ടിടം