കരുണാപുരം പഞ്ചായത്തിന്​ 39.13 കോടിയുടെ ബജറ്റ്​

നെടുങ്കണ്ടം: കരുണാപുരം പഞ്ചായത്തില്‍ 39,13,28,410 രൂപ വരവും 38,09,54,050 ചെലവും 1,03,74,360 രൂപ മിച്ചവും പ്രതീക്ഷിക്കുന്ന ബജറ്റ് വൈസ് പ്രസിഡന്‍റ്​ ഇ.ആര്‍. ബിനു അവതരിപ്പിച്ചു. കാര്‍ഷിക മേഖല, ക്ഷീരവികസനം, പശ്ചാത്തല സൗകര്യവികസനം, തെരുവുവിളക്ക് പരിപാലനം, പാലിയേറ്റിവ് കെയര്‍, ഭക്ഷ്യസുരക്ഷ, മൃഗസംരക്ഷണം, വനിത-ശിശുവികസനം, സാമൂഹിക സുരക്ഷ, ആസ്തികളുടെ സംരക്ഷണം, കുടിവെള്ള പദ്ധതികള്‍ തുടങ്ങിയവക്ക് ഊന്നൽ നൽകുന്നതാണ്​ ബജറ്റ്. കുടിവെള്ള പദ്ധതികള്‍ക്കായി 24,97,500 രൂപ വകയിരുത്തി. ലൈഫ് ഭവനപദ്ധതിയില്‍ 75 വീടുകള്‍ നല്‍കാൻ മൂന്നുകോടി, കൂട്ടാര്‍ ഷോപ്പിങ്​ കോംപ്ലക്‌സ് നിർമാണത്തിന് 33.30 ലക്ഷം എന്നിങ്ങനെ നീക്കിവെച്ചു. ഉൽപാദന മേഖലയില്‍ 49,57,200 രൂപ വകയിരുത്തി. കാര്‍ഷിക മേഖലയുടെ ഉന്നമനത്തിന്​ 49.57 ലക്ഷം, മത്സ്യകൃഷി വ്യാപിപ്പിക്കാൻ അഞ്ച്​ ലക്ഷം, മൃഗസംരക്ഷണത്തിന് ഒമ്പതുലക്ഷം, ആരോഗ്യ മേഖലക്ക്​ 33.53 ലക്ഷം, ഭിന്നശേഷിക്കാരുടെയും കുട്ടികളുടെയും ക്ഷേമത്തിന്​ 10.53 ലക്ഷം, വനിതകളുടെ ക്ഷേമത്തിന്​ 21.07 ലക്ഷം, അനിവാര്യ പദ്ധതികള്‍ക്ക്​ 88 ലക്ഷം, പട്ടികജാതി ക്ഷേമത്തിന്​ 45 ലക്ഷം, ശുചിത്വപരിപാലനത്തിന്​ 24.97 ലക്ഷം എന്നിങ്ങനെയാണ്​ ബജറ്റ്​ വിഹിതം. ഗ്രാമപഞ്ചായത്ത് പ്രസിഡന്‍റ്​ മിനി പ്രിന്‍സ്​ അധ്യക്ഷതവഹിച്ചു. സെക്രട്ടറി കെ.ആര്‍. റെസീന, അസി. സെക്രട്ടറി രേഖ ടി. സോമന്‍ തുടങ്ങിയവര്‍ പങ്കെടുത്തു.