മൂന്നാറിനെ കണ്ണീരിലാഴ്​ത്തിയ ദുരന്തത്തിന് 37 വർഷം​

* മരിച്ച കുട്ടികളുടെ ഒാർമയിൽ ബന്ധുക്കളെത്തും മൂന്നാർ: കൗതുകം കലശലായതോടെ ക്ലാസ്​ വിട്ടിറങ്ങിയ 14 കുരുന്നുകൾ ആട്ടുപാലം തകർന്ന് മരിച്ച ദുരന്തം നടന്നിട്ട്​ ഞായറാഴ്​ച 37 വർഷം​. ഹെലികോപ്ടർ കാണാനിറങ്ങിയ പഴയ മൂന്നാറിലെ സർക്കാർ സ്​കൂളിലെ കുട്ടികളാണ് 1984 നവംബർ ഏഴിന് ആട്ടുപാലത്തിൽനിന്ന്​ പുഴയിൽ വീണത്​. മൂന്നാറിലെ തോട്ടം തൊഴിലാളികളുടെ മക്കൾക്കുണ്ടായ ദുരന്തത്തി​ൻെറ ദുഃഖം പേറി ആട്ടുപാലത്തിന് സമീപം നാട്ടുകാർ അനുസ്​മരണം നടത്തും. അന്ന് സ്ഥാപിച്ച സ്മാരകഫലകത്തിന് മുന്നിലാണ് ചടങ്ങ്. പതിവില്ലാതെ ഹൈറേഞ്ച് ക്ലബി​ൻെറ മൈതാനത്ത് ഇറങ്ങാൻ ശ്രമിച്ച ഹെലികോപ്ടർ കാണാൻ ഓടിക്കൂടിയ സ്​കൂൾ വിദ്യാർഥികളാണ്​ അപകടത്തിൽപെട്ടത്​. ആകാശത്ത് വട്ടമിട്ട് പറക്കുന്ന ഹെലികോപ്ടർ ഗ്രൗണ്ടിൽ ഇറങ്ങുമെന്ന സൂചന ലഭിച്ചതോടെ കൂട്ടികൾ കൂട്ടമായി പാലത്തിലേക്ക് കയറി. അമിതഭാരം താങ്ങാനാവാതെ തൂക്കുപാലം തകർന്ന്​ കുട്ടികൾ പുഴയിൽ വീണു. ഓടിയെത്തിയ നാട്ടുകാരും അധ്യാപകരും ചേർന്ന് കുറെയേറെ കുട്ടികളെ രക്ഷപ്പെടുത്തിയെങ്കിലും 14 കുരുന്നുകൾ മരണക്കയത്തിൽ ആണ്ടുപോയിരുന്നു. മൂന്നാറിലുണ്ടായ ഏറ്റവും വലിയ ദുരന്തങ്ങളിൽ ഒന്നായിരുന്നു അത്. പിന്നീട് പാലം പുതുക്കിപ്പണിതെങ്കിലും വീണ്ടും തകർന്നു. പാലത്തിന്​ സമീപം കുട്ടികളുടെ പേരെഴുതിയ ഫലകവും സ്ഥാപിച്ചു. ഓരോ വാർഷികത്തിനും കുടുംബാംഗങ്ങൾ ഇവിടെയെത്തി പ്രാർഥന നടത്തും. ഇത്തവണയും അവരെല്ലാവരും ഒത്തുകൂടും.