കനത്ത മഴ: പള്ളനാട്ടിൽ 30 കുടുംബങ്ങളെ മാറ്റി പാർപ്പിച്ചു

മറയൂർ: തുടര്‍ച്ചായി പെയ്യുന്ന മഴയെത്തുടർന്ന്​​ പള്ളനാട്ടിൽ മലയിടുക്കില്‍നിന്ന്​ പാറതെന്നി നീങ്ങുകയും ഭൂമിക്കടിയില്‍നിന്ന്​ ശക്തമായി വെള്ളം പുറത്തേക്ക്​ വരുകയും ചെയ്യുന്ന സാഹചര്യത്തില്‍ മുപ്പതോളം കുടുംബങ്ങളെ മാറ്റിപ്പാര്‍പ്പിച്ചു. മറയൂര്‍-മൂന്നാര്‍ റോഡില്‍ പള്ളനാടിനു സമീപം കര്‍പ്പൂരക്കുടി ആദിവാസി കോളനിക്ക് താഴെയാണ്​ പാറയിടുക്കില്‍നിന്ന്​ ഞായറാഴ്ച ഉച്ചമുതല്‍ ശക്തമായ വെള്ളം പുറത്തേക്ക് വന്നുകൊണ്ടിരിക്കുന്നത്. പ്രദേശവാസികള്‍ വിവരം അറിയിച്ചതിനെ തുടര്‍ന്ന് റവന്യൂ, പൊലീസ് അധികൃതര്‍ സ്ഥലത്തെത്തി ഉരുള്‍പൊട്ടല്‍, മണ്ണിടിച്ചില്‍ സാധ്യതകള്‍ കണക്കിലെടുത്ത് പള്ളനാട് പാലം വരെയുള്ള 30 കുടുംബങ്ങളെ ബന്ധുവീടുകളിലേക്കും പള്ളനാട് സ്കൂളിലേക്കും താമസം മാറ്റി. വൈകീട്ട്​ ആറിനുശേഷം മറയൂര്‍ മേഖലയില്‍ മഴക്ക് ശമനം ഉണ്ടായതിന്റെ ആശ്വാസത്തിലാണ് അധികൃതരും പ്രദേശവാസികളും. ​