ജില്ലയിൽ 2690പേർ അതിദരിദ്രർ

തൊടുപുഴ: ജില്ലയിൽ 2690​പേർ അതിദരിദ്രരെന്ന്​ ദാരിദ്ര്യ ലഘൂകരണ സർവേയുടെ കണ്ടെത്തൽ. ഭൂമിശാസ്ത്രപരമായ പ്രത്യേകതകള്‍ കൊണ്ട് ദുര്‍ഘടമായതും ഗതാഗത സൗകര്യം അപര്യാപ്തവുമായ പ്രദേശങ്ങളില്‍ എല്ലാം സമയബന്ധിതമായി പരിശോധിച്ചാണ്​ സർവേ പൂർത്തിയാക്കിയത്​. ജില്ലയിലെ 52 പഞ്ചായത്തുകള്‍, രണ്ട്​ നഗരസഭകള്‍ എന്നിവിടങ്ങളിലെ 861 വാര്‍ഡുകളിലെ 3.46 ലക്ഷം കുടുംബങ്ങളില്‍നിന്നാണ്​ 3063 പേരെ അതിദാരിദ്ര്യ നിര്‍ണയ പ്രക്രിയയിലൂടെ അതി ദരിദ്രരായി പ്രാഥമികമായി കണ്ടെത്തിയത്. ഭക്ഷണം, ആരോഗ്യം, പാര്‍പ്പിടം, വരുമാനം എന്നീ മാനദണ്ഡങ്ങളുടെ അടിസ്ഥാനത്തിലാണ് സർവേ നടത്തിയത്. ബ്ലോക്ക് പഞ്ചായത്ത്തല ഉദ്യോഗസ്ഥരും സാമ്പത്തിക സ്ഥിതി വിവരകണക്ക് വകുപ്പ് ഉദ്യോഗസ്ഥരും തുടർന്ന്​ സൂക്ഷ്മതല പരിശോധന നടത്തി. പരിശോധനക്കുശേഷം 2690 പേരാണ് അതിദരിദ്രരുടെ അന്തിമ പട്ടികയിലുള്ളത്. ഇടമലക്കുടിയില്‍ 16 പേരെയാണ് കണ്ടെത്തിയിട്ടുള്ളത്. 32 പഞ്ചായത്തുകളില്‍ 50 ല്‍ താഴെ ആളുകളും, 16 പഞ്ചായത്തുകളില്‍ 50 മുതല്‍ 100 വരെയുള്ള ആളുകളും ആറ്​ പഞ്ചായത്തുകളില്‍ 100ന്​ മുകളില്‍ ആളുകളെയും അതിദരിദ്രരായി കണ്ടെത്തിയിട്ടുണ്ട്. കട്ടപ്പന നഗരസഭയിൽ 149 തൊടുപുഴ 122 എന്നിങ്ങനെയുമാണ്​. മൊബൈല്‍ ആപ്ലിക്കേഷനുകള്‍ വഴിയാണ് വിവരശേഖരം നടത്തിയത്. ഇടുക്കി ദാരിദ്ര്യ ലഘൂകരണ വിഭാഗം പ്രോജക്ട് ഡയറക്ടറായ സാജു സെബാസ്റ്റ്യനായിരുന്നു ജില്ല നോഡല്‍ ഓഫിസര്‍. തൊഴിലുറപ്പ് പദ്ധതി സിറ്റിങ്​ 11ന് തൊടുപുഴ: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി സിറ്റിങ് 11ന് രണ്ടിന്​ ഇടുക്കി ബ്ലോക്ക് പഞ്ചായത്ത് ഓഫിസില്‍ നടക്കും. തൊഴിലുറപ്പ് പദ്ധതിയുമായി ബന്ധപ്പെട്ട പരാതികള്‍ തൊഴിലാളികള്‍ക്കും പൊതുജനങ്ങള്‍ക്കും ജനപ്രതിനിധികള്‍ക്കും നേരിട്ട് നല്‍കാവുന്നതാണ്.