ലൈഫ്​ മിഷൻ: പുനഃപരിശോധനയിൽ 23,138 അപേക്ഷകർ പുറത്ത്​

P/2 lead... തൊടുപുഴ: ജില്ലയിൽ ലൈഫ്​ മിഷൻ ഭവന പദ്ധതിയിലേക്കുള്ള അപേക്ഷകളുടെ പുനഃപരിശോധന പൂർത്തിയായപ്പോൾ 23,138 പേർ പുറത്ത്​. വ്യത്യസ്ത മാനദണ്ഡങ്ങളെ അടിസ്ഥാനമാക്കി വിവിധ വാർഡുകളിൽനിന്നുള്ള അ​പേക്ഷകൾ പുനഃപരിശോധിച്ചപ്പോഴാണ്​ ഇത്രയും പേർ പുറത്തായത്​. ഇവർക്ക്​ ഇനിയും അപ്പീൽ നൽകാൻ അവസരം ഒരുക്കിയിട്ടുണ്ട്​. 58,716 പേരാണ്​ പദ്ധതിയിലേക്ക്​ അപേക്ഷ നൽകിയത്​. ഇതിൽനിന്ന്​ ആദ്യഘട്ട പരിശോധനക്ക്​ ശേഷം അർഹരായവരുടെ പട്ടിക തയാറാക്കി. എന്നാൽ, ഒരു വാർഡിൽനിന്ന്​ 40 ശതമാനത്തിലധികം അപേക്ഷകർ ഗുണഭോക്​തൃ പട്ടികയിൽ ഉൾപ്പെട്ടിട്ടുണ്ടെങ്കിൽ പുനഃപരിശോധന വേണമെന്ന്​ സർക്കാറിന്‍റെ നിർദേശം വന്നു. ഇതിന്‍റെ അടിസ്ഥാനത്തിൽ നടത്തിയ പരിശോധനയിലാണ്​ 23,138 പേർ പുറത്തായത്​. 35,578 പേരാണ്​ പട്ടികയിൽ ഇടംപിടിച്ചിട്ടുള്ളത്​. ഇതിൽ 24,383 പേർ ഭൂമിയുള്ളവരും 11,195 പേർ ഭൂമിയില്ലാത്തവരുമാണ്​. പുനഃപരിശോധനയുടെ അടിസ്ഥാനത്തിലുള്ള കരട്​ പട്ടിക ജൂൺ ഏഴിന്​ പ്രസിദ്ധീകരിക്കും. കരട്​ പട്ടിക സംബന്ധിച്ച്​ ആക്ഷേപമുള്ളവർക്ക്​ 14 വരെ ഒന്നാംഘട്ട അപ്പീലിന്​ അവസരമുണ്ട്​. ഗ്രാമപഞ്ചായത്തുകളിൽ ബ്ലോക്ക്​ പഞ്ചായത്ത്​ സെക്രട്ടറിക്കും നഗരസഭകളിൽ നഗരസഭ സെക്രട്ടറിക്കുമാണ്​ അപ്പീൽ സമർപ്പിക്കേണ്ടത്​. അപ്പീലുകൾ 24നകം പൂർത്തിയാക്കും. തുടർന്നും ആക്ഷേപമുള്ളവർക്ക്​ 30നകം കലക്ടർക്ക്​ രണ്ടാം ഘട്ട അപ്പീൽ സമർപ്പിക്കാം. അപ്പീൽ തള്ളപ്പെട്ടവർക്കും ആദ്യഘട്ടത്തിൽ അപ്പീൽ നൽകാത്തവർക്കും രണ്ടാംഘട്ടത്തിൽ നൽകാം. രണ്ടാം ഘട്ട അപ്പീൽ ജൂലൈ 14നകം തീർപ്പാക്കണമെന്നാണ്​ നിർദേശം. ഇതിന്​ ശേഷമുള്ള കരട്​ പട്ടിക ജൂലൈ 15ന്​ പ്രസിദ്ധീകരിക്കും. കരട്​ പട്ടികക്ക്​ ജൂലൈ 30നകം ഗ്രാമസഭകളുടെയും ആഗസ്റ്റ്​ മൂന്നിനകം തദ്ദേശസ്ഥാപന ഭരണസമിതികളുടെയും അംഗീകാരം നേടേണ്ടതുണ്ട്​. ആഗസ്റ്റ്​ പകുതിയോടെ​ വെബ്​സൈറ്റിൽ ഉൾപ്പെടെ ഗുണഭോക്​തൃ പട്ടിക പ്രസിദ്ധീകരിക്കാനാണ്​ ലക്ഷ്യമിടുന്നത്​.