ക്രിസ്ത്യൻ തീവ്ര വിദ്വേഷ ഗ്രൂപ്പുകളോടുള്ള നിലപാട് സഭകൾ വ്യക്തമാക്കണം -നഹാസ് മാള

തൊടുപുഴ: കേരളത്തിൽ നിലനിൽക്കുന്ന മതസൗഹാർദവും സഹവർത്തിത്വവും തകർക്കുംവിധം സംഘ്പരിവാറിനൊപ്പം വിദ്വേഷപ്രചാരണങ്ങൾക്കും ഹേറ്റ് കാമ്പയിനുകൾക്കും നേതൃത്വം നൽകുന്ന തീവ്ര ക്രൈസ്തവ ഗ്രൂപ്പുകളോടുള്ള നിലപാട് സഭാനേതൃത്വങ്ങൾ പരസ്യമായി പ്രഖ്യാപിക്കണമെന്ന്​ സോളിഡാരിറ്റി യൂത്ത്​ മൂവ്​മെന്‍റ്​ സംസ്ഥാന പ്രസിഡന്‍റ്​ നഹാസ്​ മാള ആവശ്യപ്പെട്ടു. വെറുപ്പും വിദ്വേഷവും വ്യാജപ്രചാരണങ്ങളും നടത്തുന്ന കാസ പോലുള്ള തീവ്ര ഗ്രൂപ്പുകളെ ഒളിഞ്ഞും തെളിഞ്ഞും പിന്തുണക്കുന്നവരുടെ എണ്ണം വർധിക്കുന്നത് മത സഹവർത്തിത്വത്തി‍‍ൻെറ വക്താക്കളായ സഭകൾ ഗൗരവമായി കാണണമെന്നും പറഞ്ഞു. കാസർകോട്ടു​നിന്ന്​ ആരംഭിച്ച 'ഇസ്​ലാമോഫോബിയ കുറ്റകൃത്യമായി പ്രഖ്യാപിക്കുക' പ്രമേയത്തിലെ യൂത്ത് കാരവന് തൊടുപുഴ മങ്ങാട്ടുകവലയിൽ നൽകിയ സ്വീകരണ സമ്മേളനത്തിൽ സംസാരിക്കുകയായിരുന്നു അദ്ദേഹം. സംസ്ഥാന സെക്രട്ടറി ഒ.കെ. ഫാരിസ് ഉദ്​ഘാടനം ചെയ്തു. ജില്ല വൈസ് പ്രസിഡന്‍റ്​ ഹാരിസ് അൻസാർ അധ്യക്ഷത വഹിച്ചു. ജമാഅത്തെ ഇസ്‌ലാമി ജില്ല പ്രസിഡന്‍റ്​ ഷാജഹാൻ നദ്‌വി, എസ്​.ഐ.ഒ ജില്ല പ്രസിഡന്‍റ് ഷബീർ മൂസ, സോളിഡാരിറ്റി സംസ്ഥാന സെക്രട്ടറി തൻസീർ ലത്തീഫ്, ജമാഅത്ത്​ വനിതവിഭാഗം ജില്ല പ്രസിഡന്‍റ്​ ആയിശ ബാവ എന്നിവർ സംസാരിച്ചു. വി.എച്ച്​. അബ്ബാസ് സ്വാഗതവും ജമാഅത്തെ ഇസ്‌ലാമി തൊടുപുഴ ഏരിയ പ്രസിഡന്‍റ്​ പി.പി. കാസിം മൗലവി നന്ദിയും പറഞ്ഞു. സമ്മേളനഭാഗമായി നടന്ന പ്രകടനത്തിന് ജില്ല നേതാക്കളായ അഫ്‌സൽ ഹുസൈൻ, ഷബീർ ഉടുമ്പന്നൂർ, ടി.എസ്.​ ഹുസൈൻ, പി.എച്ച്.​ അർഷദ് എന്നിവർ നേതൃത്വം നൽകി. FOTO TDL SOLIDARITY തൊടുപുഴയിൽ എത്തിയ സോളിഡാരിറ്റി യൂത്ത് ​കാരവൻ അംഗങ്ങളെ പ്രവർത്തകർ സമ്മേളനവേദിയിലേക്ക് സ്വീകരിക്കുന്നു ​