വണ്ടിപ്പെരിയാറിലെ ആറു​ വയസ്സുകാരിയുടെ കൊലപാതകം: വിചാരണ തുടങ്ങി

കട്ടപ്പന: വണ്ടിപ്പെരിയാർ ചുരക്കുളം എസ്റ്റേറ്റ് ലയത്തിലെ ദമ്പതികളുടെ ആറു വയസ്സുള്ള മകളെ പീഡിപ്പിച്ചശേഷം കൊന്ന്​ കെട്ടിത്തൂക്കിയ സംഭവത്തിൽ വിചാരണ തുടങ്ങി. കട്ടപ്പന ഫാസ്റ്റ്ട്രാക്ക് സ്പെഷൽ കോടതിയിൽ സ്പെഷൽ ജഡ്ജ് ഫിലിപ്പ് തോമസ് മുമ്പാകെയാണ്​ തിങ്കളാഴ്ച വിചാരണ നടപടി തുടങ്ങിയത്. കേസിൽ 10 സാക്ഷികൾ ഹാജരായെങ്കിലും ഒന്നും രണ്ടും സാക്ഷികളായ അയൽവാസികളുടെ വിസ്താരമാണ് പൂർത്തിയായത്. പ്രതി അർജുന്‍റെ അച്ഛൻ അടക്കം മറ്റു സാക്ഷികൾ ചൊവ്വാഴ്ച കോടതിയിൽ ഹാജരാകും. പ്രതിക്കെതിരെ പട്ടികവർഗ വിഭാഗങ്ങൾക്കെതിരായ അതിക്രമം തടയൽ നിയമപ്രകാരവും കേസെടുക്കണമെന്ന്​ ആവശ്യപ്പെട്ട് പെൺകുട്ടിയുടെ പിതാവ് ഹൈകോടതിയെ സമീപിച്ചിരുന്നു. എന്നാൽ, ഹരജിക്കാരന് സെഷൻസ് ജഡ്ജിയെ സമീപിക്കാമെന്നാണ് കോടതി വ്യക്തമാക്കിയത്. ഈ ആവശ്യം തിങ്കളാഴ്ച സ്പെഷൽ കോടതിയിൽ ഉന്നയിച്ചെങ്കിലും കൂടുതൽ വാദം കേൾക്കാൻ ചൊവ്വാഴ്ചത്തേക്ക്​ മാറ്റി. പ്രതി അർജുനും പട്ടികവർഗ വിഭാഗത്തിൽപെട്ടയാളാണ് എന്നാണ്​ പൊലീസ് രേഖകളിലുള്ളത്. 2021 ജൂൺ 30നാണ് എസ്‌റ്റേറ്റ് ലയത്തിലെ മുറിക്കുള്ളില്‍ ആറു വയസ്സുകാരിയെ തൂങ്ങിമരിച്ച നിലയിൽ കണ്ടെത്തിയത്. ഫോട്ടോ. കേസിലെ പ്രതി അർജുനെ കോടതിൽ വിചാരണക്കായി കൊണ്ടുവന്നപ്പോൾ (കറുത്ത ടീ ഷർട്ട്‌ ധരിച്ചയാൾ.)